adminCharity Moyo
INHLANGANISO ebona ngezokulima eyeAgritex isikhuthaze abalimi bama-butternut ukuthi sebengaqalisa ukufaka inhlanyelo phansi.
UMnumzana Evans Maputsa oyingcitshi kweze-holticulture uveze ukuthi abalimi abafisa ukulima isilimo lesi kumele baqalise ukusilima khathesi.
Uthe isilimo lesi kumele silinywe ekuqaliseni kobusika ngesikhathi umqando usuphelile.
“Ama-butternut kawafuni mqando ngoba ayatshazwa njalo acina engakhuli kuhle kungakho abalimi kumele baqalise khathesi ukuwalima ngoba umqando usudlule ukuze simile kuhle njalo sibe lamajodo amakhulu,” kutsho uMnu Maputsa.
Ubuye waveza ukuthi isilimo lesi silula ukulima ngoba kasidingi manzi amanengi ekuthelelweni ngoba engaba manengi kucina kubangela ukubola kwentanga ezihlanziweyo.
“Isilimo lesi akumelanga silinywe ngesikhathi sezulu ngoba singaba lamanzi amanengi sicina sibola.
“Kungakho isilimo lesi kumele silinywe ekupheleni kwenyanga kaNcwabakazi kusiya phakathi kukaMpandula ukuze ilanga likaMfumfu lithole sesimilile kuthi njalo isikhathi sezulu elinengi sifika sithole sokuvuniwe ngoba isilimo lesi sithatha inyanga ezintathu kuphela ukuze sivuthwe,” kuchaza uMnu Maputsa.
Uqhubekele phambili esithi kubalulekile ukuthi umlimi wonke ofisa ukulima isilimo lesi ehambelane lesikhathi ukuze abelenzuzo enhle.
Uveze ukuthi inhlanyelo yama-butternut ihlanyelwa endaweni engathi iphakeme hatshi okwehle khona.
“Umlimi kumele afake umquba ukuze izilimo zakhe zikhule kuhle njalo kugodi linye ngalinye kumele aphosele intanga ezimbili kodwa akumelanga zibe seduze duze ngoba kwenza abantwana babe bancane kulabakhangelelweyo.
Uphinde waveza ukuthi izilimo lesi siyahlaselwa yimikhuhlane eminengi ngakho kudingeka ukuthi umlimi ahlale efafaza imithi ukuze avikele izilimo zakhe.
UMnu Maputsa uphethe ngokukhuthaza abalimi ukuthi balime isilimo lesi ngoba silemali enengi ikakhulu ngenyanga esivunwa ngayo ekaMpalakazi ngoba kuyabe kulekhefu njalo kasilandleko ezinengi.
Online Reporter