Online Reporter
Nkosilathi Sibanda
UKUKHULA komnotho kusezandleni zabasakhulayo okumele basekelwe ngokwabelwa imfundo yemisebenzi yezandla ezabancedisa ukuthi bavule amabhizimusi aguqula umkhonomi.
Lokhu kukhulunywe nguMsekeli kaSodolobho wakoBulawayo uMumzana Edwin Ndlovu kumkhosi wokuqeqetshwa kwabafundi abangu-243, abaqede izifundo zemisebenzi yezandla emakolitshini ekhansili yakoBulawayo ngoLwesine.
Abafundi laba baphuma kumakolitshi ekhansili asemalokitshini, lapho okufundiswa khona imisebenzi egoqela ukwakha, ukubaza, ukulima, ukuthunga izigqoko, home economics, ukuphatha amahotela, ukupheka, ukulungisa impompi, ukupenda, ukunusela lokulungisa insimbi.
UMsekeli kaSodolobho uthe ukunikezwa kwezithupha kubafundi kumele kube yisitshengiselo sokuthi ikusasa yelizwe iphethwe yilutsha olulolwazi kwezemisebenzi yezandla.
“Lo akusiwo umcimbi wokuphiwa izethifikhethi kuphela, kodwa ngumkhosi wokuthakazelela ukuzimisela, ukuzithiba lokubekezela. Kuminyaka emithathu edluleyo, litshengise ukubekezela lokusebenza ngokuzimisela isikhathi eside njalo selilungele ikusasa elihle,” kutsho uNdlovu, obemele uSodolobho uDavid Coltart.
Umkhosi lo uqhutshwe ngaphansi kwendikimba ethi: “Ukugqugquzela ukuphakanyiswa kwentsha ngemfundo.”
UKhansila Ndlovu uthe indikimba le ihambelana ngqo lombono welizwe owe-Vision 2030.
“Indikimba le iveza sobala umlandu wekhansili yakoBulawayo ekufezeni iVision 2030 eqinisekisa isidingo sokuphakamisa ithalenta, imfundo, ukukhuliswa komnotho welizwe lokusetshenziswa kwemitshina yakulezi insuku.
“Ukukhula komkhonomi welizwe kusezandlela zabantu abaphethe ulwazi, abangenelisa ukwakha Amacebo engqubekela phambili. Idolobho lakoBulawayo ligcwalisisa umbono lo ngokusekela ukufundiswa kwabasakhulayo.”
Ukhuthaze abafundi ukuthi ngemva kokuthola izethifikhethi zabo, kumele baqhubekele phambili ngezifundo lokusungula amabhizimusi.
“Kubafundi, ngithi kabathathe lelithuba ukuthi baqhubeke befunda. Labo abangazange benze ama-trade test, ngibakhuthaza ukuthi bakwenze lokhu ukuze kube lula ukuthi bathole imisebenzi lokuthi bavule awabo amankampani.
“Umkhonomi usufuna abantu abenelisa ukuvula amankampani, baphinde bavulele abanye amathuba okusebenza.”
Uncome ukusebenza kukaHulumende, ingatsha ezizimela zodwa lekhansili ekuphakamiseni intsha yakuleli.
“Ngitshayela ihlombe inhlanganiso ezizimele zodwa ezisekele uHulumende lekhansili yakoBulawayo, ikakhulu ugatsha lwezindlu lemisebenzi kazulu.
“Ngincoma umsebenzi weSNV, World Vision, Plan International Zimbabwe leBulawayo Vendors and Traders Organisation. Usekelo lwengatsha ezizimele zodwa kwezengqubekela phambili luphathisa kakhulu ukuthi amakolitshi awe-vocational training enze umsebenzi wawo. Ngiphakamise njalo lamankampani lenhlanganiso ezinikeza abafundi amathuba okufundela imisebenzi abayifundelayo.
