Online Reporter
Ethel Ncube
IKHANSILI yedolobheni lakoBulawayo ithanda ukwazisa uzulu ukuba sekuqhamuke umkhuhlane we-hand, foot and mouth koBulawayo.
Isitatimende esikhutshwe ngunobhala wekhansili yakoBulawayo uMnumzana Christopher Dube uveze ukuba abantu balimuke njalo baqaphele ukumemetheka komkhuhlane lo.
“Umkhuhlane lo uhlasela abantwana abaleminyaka engaphansi kwengu-5 njalo labadala balakho ukuba lawo.
“Umkhuhlane lo uthelelelwana ngamathe, amakhovula kunye lamanzi asuka ezilondeni,” kutsho uMnu Dube.
Izibonakaliso zomkhuhlane weHand Foot and Mouth zigoqela izilonda ezibuhlungu emlonyeni, ukuqubuka, amaqhubu alamanzi ezandleni lasenyaweni, izilonda emphinjeni lemlonyeni, ukutshisa komzimba kanye lokudinwa lokwehluleka ukudla.
Kubikwa izibonakaliso lezi zibonakala ngemva kwamalanga amathathu kusiya kwayisithupha uthelelekile.
Ikhansili iqhubekele phambili iveza okungenziwa ukuze umkhuhlane lo ungamemetheki.
“Uzulu ukhuthazwa ukuthi ageze izandla nxa eqeda ukusebenzisa isambuzi kumbe uqeda ukuntshintsha umntwana isitshubo, hlanza indawo lapho abantu ababamba khona ngezandla ngesepa, kanye lokungasebenzisi izinto ezisetshenziswa ngumuntu ogulayo kunye lokungangani.
“Abantwana kumbe abadala abathe bahlaselwa ngumkhuhlane kumele bahlale ngekhaya baze basile njalo izilonda zize zome,” kutsho isitatimende lesi.
Ikhansili yakoBulawayo ikhuthaza abahlali bakoBulawayo ukuba nxa becabangela ukuba umkhuhlane lo usukhona babikele abezempilakahke abaseduzane labo ukuze kwenqatshelwe ukumemethaka kwawo.
