admin
Listen Ndlovu
ZETHUKILE izakhamizi zesiqintini seMagotsha Line eTsholotsho ngemva kokuba abantwana ababili kunye lonina belimele ngoMgqibelo kuyonale iviki edluleyo kulandela ukudutshukelwa ‘‘libhomba’’.
Abantwana laba omunye oleminyaka emithathu lomunye oleminyaka engu-12 kunye lonina abahlala ngaphansi kwenduna uNgqoya basesibhedlela seMpilo kulandela ukudluliselwa esibhedlela lesi besuka eTsholotsho.
Oleminyaka engu-12 kubikwa walimala ebusweni, idolo lomlenze kukanti unina okubikwa ukuba uzithwele yena walimala esiswini ngesikhathi ibhomba leli lidubuka.
UMthunywa uzwe ukuba abantwana laba badobha ‘ibhomba’ leli bevela ezitolo ngoLwesihlanu baqala ukulidlalisa.
UNkosazana Siboniso Tshuma onguyisekazi wabantwana laba uchasisele uMthunywa ngesehlakalo lesi.
“Lo omdala wadobha lokho esicabangela ukuthi libhomba ngoLwesihlanu evela ezitolo wabuya lakho ekudlalisa esiza ekhaya.
“Ngalelolanga kwalala kusegumeni, kwathi ngoMgqibelo ngehola lesithathu ngemva kwemini kwadubuka ekudlalisa. Kwalimala abafana laba kunye lonina ebusweni, esiswini, emathangazini kunye lezandla. Lo omncane nguye owalimala kakhulu,” kuchaza uNkszn Tshuma.
“Ngangisemzini wami ngesikhathi kufika abantwana bezongitshela ukuthi sokulomonakalo komnewethu.
Oleminyaka engu-12 owayephandle ngesikhathi kudubuka, walimala amakhala, walimala inyawo, isisu kunye lezandla.
“Omncane wayesemkulwini lonina ngesikhathi kudubuka kodwa laye walimala amakhala, idolo lasemlenzeni kukanti unina walimala esiswini njalo njengomuntu ozithweleyo wayevele engasakhulumi.
“Sabathwalela esibhedlela seTsholotsho basebedluliselwa esibhedlela seMpilo koBulawayo ngeSonto bonke bobathathu,” nguNkszn Tshuma lowo.
“Sikhathazekile kakhulu ngoba lobaba wabantwana laba kasebenzi futhi asazi ukuba kuzaqalelwa ngaphi ngoba imali ezifuneka esibhedlela ziyasikhama.
“Sidinga uncedo ngoba imali zakhona zinengi asila lapho esingaqalisela khona,” nguNkszn Tshuma lowo.
Ekhasini lamapholisa kuTwitter, amapholisa abike ukuba lindaba ifikile kibo.
“Amapholisisa ayaqhubeka ngokuchwayisiswa ukuze kutholakale ukuthi yisikhali bani esadubukayo,” kutsho isitatimende lesi samapholisa.
Online Reporter