Online Reporter
Nkosilathi Sibanda
AKUBIZWA ozwayo enkundleni yeSomhlolo eLupane, esabelweni seMatabeleland North lapho okuzadibana khona amaqembu enguqu kumqhudelwano weMayor’s Soccer Festival ngempelaviki.
Umncintiswano lo uzahlanganisa amaqembu avela koBulawayo eLupane lakwezinye indawo esabelweni seMatabeleland North. Ukuze kuqhutshwe imidlalo le, iLupane Local Board ibambane logatsha lwezemidlalo kuHulumende, Lupane Sports Committee leLupane Football League.
Amaqembu akhangelelweyo agoqela iLupane City, Ceballos, Matshakayile, Celtics, St Lukes, East Rovers, Lake Alice leNgamo FC.
Amanye amathimu azabikwa kusiyaphela iviki le.
Umhlonitshwa welanga kubikwa nguJoel Luphahla umqeqetshi omutsha oweFC Platinum, awake wadlalela, waqeqetsha leHighlanders. ULuphahla ngesizini edluleyo ubeqeqetsha iSimba Bhora.
Inhloso yemidlalo le, ngokutsho kukamgcinisihlalo weLupane Local Board uThandolwenkosi Nyoni:
“Imidlalo yeMayor’s Soccer Festival ngeyokuthakazelela ikhisimusi kunye lokuvumbulula ithalenta lomdlalo wenguqu elingaziwayo kulindawo kunye lasesabelweni seMatabeleland North jikelele,” kutsho uNyoni.
“Sihlose njalo lokusebenzisa umdlalo wenguqu ukuqinisa umkhankaso wokulwisana lezidakamizwa esezitshaphaze impilo yabantwabethu. Siphezulu kokuqoqa konke okumele kubekhona njalo sinxusa labo abangabe bezimisele ukuthi baxhase imidlalo. Imali ezatholwa kumidlalo le izadluliselwa kundawo ezigcina intandane ukuze zibelekhisimusi emnandi. Ngokwenza lokhu, sisekela inyathelo likaHulumende loulwisana lezidakamizwa.”
