Kuqhutshwa umngcwabo omkhulu wabangu-12 abedlula kungozi yeQuantum eyadubukayo

Sikhumbuzo Moyo

Kuqhutshwa inkonzo yomngcwabo wabangu-12 abedlula kungozi yomgwaqo ngesikhathi kudubuka iToyota Quantum duzane leChipangali leSigodini tollgate ngoLwesine emini.

Umphathintambo obona ngokwenzakala esabelweni seMatabeleland South, uAlbert Nguluvhe, nguye okhokhele lumngcwabo odonse iziphathamandla zikahulumende kanye lamalunga edale lephalamende.

**Umphathintambo obona ngokwenzakala esabelweni seMatabeleland South, uAlbert Nguluvhe loMphathintambo wezeMvelo, lesimo Sezulu, u-Evelyn Ndlovu**

Phakathi kwabo bekuloMphathintambo wezeMvelo, lesimo Sezulu, u-Evelyn Ndlovu omele iMzingwane, uMsekeli kaMphathintambo obona ngezokuvikeleka, uBrigadier General (Rtd) Levi Mayihlome kanye loMsekeli kaMphathintambo obona ngezokukhitshwa kwembiko uOmphile Marupi.

Ekhuluma lentatheli, uMphathintambo uNguluvhe uchaze ingozi le njengendida, nanko kunakanelwa ukuba imota le yayithwele iziqhumane.

“Uphenyo lusaqhubeka yebo, kodwa kuyacaca ukuthi imota le yayithwele iziqhumane, ngifuna ukutshiyela amapholisa umlandu wokuthi benze inhlolisiso ejulileyo, angacini nje ngokuthi kwakuleziqhumane kodwa badingisise lokuthi zazithengwe ngaphi futhi zisiya ngaphi,” utsho kanje.

Amapholisa ngoLwesihlanu akhiphe amagama abangu-9 kwabangu-12 okuqinisekisiwe ukuthi batshonile. Abatshonileyo kuthiwa nguThabani Moyo (37) we-Old Lobengula, koBulawayo; Nobuhle Mdlongwa (37) weNtumbane, koBulawayo; Oscar Mdlongwa (44); Sicelesile Mabhena weNkulumane 5, koBulawayo; Sibusiso Mabhena (5) weNkulumane 5; Mhlupeki Limkani Sibanda (36) weNkulumane 5; Tedious Ncube; Precious Moyo (36) wePumula North, koBulawayo; kanye loSthembiso Brian Gabadela. Uphenyo lwamapholisa lokudingisisa ngembangela yengozi le ebulele abantu abanengi luyaqhubeka.