Online Reporter
Innocent Kurira
UMQEQETSHI weHwange uNjabulo Ncube uthe akumelanga babe lamawala okujabulela ukuba phezulu kwelogu ngoba umncintiswano usasekhona.
Uthe loba bedlala kuhle, okumqoka yikwenqabela ukuthaba okwedlulisileyo. Uphinde welukela abadlali ukuthi bengacabangi ukuba sebezintshantshu.
Izimbamgodi lokhe zingakanqotshwa kumidlalo eyisikhombisa kuZifa Southern Region. Njengoba zisakhokhela kulogu, kumele njalo ziqaphele ukukhitshwa esikhundleni yiTalen Vision, Nkayi United leCasmyn.
IHwange iphethe imklomelo engu-17, inqobe imidlalo emihlanu, yadlala ngokulingana kwemibili. Okwakhathesi isihlohle amabhola angu-15, yahlohlwa kabili kuphela.
Lanxa impumela ibonakala imihle, uDube uthe isivivinyo sangempela sisekhona njengoba amaqembu eqhubeka elwela ukuba phezulu.
“Sisemzileni olungileyo. Kumele silwele impumela engcono kumidlalo yonke. Isizini inzima, wonke amaqembu ayancintisana njalo akulula,” kutsho uDube.
“Ukuthi sibizwa njengeqembu elikhangelelwe ukuba zintshantshu akutsho lutho. Imidlalo yethu emihlanu elandelayo izakuba yinsika njalo ibengumfanekiso ocacayo wokuthi simi njani lokuthi sifuna ukwenzani kulisizini.
“Siqale kuhle, yebo, kodwa kukhona esingakwenzi kahle. Kumele siqhubeke ngendlela engasoke isiphazamise. Kuligi, nxa uphumula kancane uyajeziswa, ngakho kumele sihlale sigxilile, sisebenze gadalala kuyo yonke imidlalo. Akula imidlalo elula kuliligi.
“Wonke umuntu ulwela okuthile, ngakho kumele sihloniphe wonke amaqembu esibhekana lawo njalo siqhubeke sizama ngamandla wonke nxa sifuna ukuhlala lapho esikhona.”
Ukuqala kuhle kweHwange kutshengisa iqembu elizimisele ukuthola ukukhutshulelwa kuPremiership.
Kodwa-ke, amanye amaqembu aselandela, aseseduze kakhulu. IBulawayo Warriors isiqhamuke njengomncintisi omkhulu, ilemiklomelo engu-14 ngemva kokunqoba okuhle nge-4-0 phezu kwe-Aqua Stars.
ITalen Vision ihlezi endaweni yesithathu ngemiklomelo.
IZimbabwe Saints, ngaphansi komqeqetshi uPhilani Ncube, kancane kancane isiqala ukubuyisela indlela yayo lanxa iqale kancane. Ihlezi endaweni yetshumi.
Phansi kwelogu kuleBosso 90 ebhekane lobunzima. Isithole imiklomelo emithathu kuphela.
