Online Reporter
Nkosilathi Sibanda loFungai Muderere
NGESONTO ezayo, laleyo ezalandela, kuzakhulunywa ngamaqembu amabili, ayizitha ezasongelanayo kumdlalo wenguqu iBosso leDynamos.
Zombili, ezibalelwa kwezinkulu kunobhutshuzwayo wakuleli, ziqala ukungqikilana mhlaka 19 Mfumfu kumdlalo weCastle Lager Premier Soccer League, eBarbourfields, qede lapho ziyehlangana ku semifinal yenkezo yeChibuku Super.
Lalabo abasekela amanye amathimu bazalandela imidlalo le, bedinga ukubona ukuthi isasekhona na impi yakudala phakathi kwawo ngoba kulisizini adonse nzima kumidlalo yeligi, kungekho okokukhuluma ngawo.
Okuhlabusayo kukho konke yikuphenduka kukamqeqetshi weDynamos, uKelvin Kaindu, eBarbourfields. Kukhangelelwe ukuthi uKaindu aphindisele ngokuyibhaxabula iHighlanders, nanko waxotshwa kuyo ngendlela engazange imthabise phakathi kwesizini.
Uphenduka esekhuza isitha esikhulu koBulawayo, esazi Mhlophe ukuthi ulakho ukubuyela eHarare esezondwa linengi labalandeli beHighlanders. Phezulu kwalokho, uKaindu ukhangelele ukuthi anqobe ngamabhola amanengi njengoba iDembare ibalekela ukuphuma kuPSL.
Akusoke kubelula ukuqethula iHighlanders egumeni layo. Uyakwazi lokho uKaindu.
Lokhe eqina ngokuthi imikhuleko yabo izabakhipha engozini.
“Ngibona angathi umdlalo lo ufike ngesikhathi esiyiso ngoba sidlala kuhle kulezinsuku,” kutsho uKaindu.
“Kuzahlabusa ukuphenduka eBarbourfields. Umdlalo lo uzavusa imizwa ngoba kufana lokuthi kusekhaya lami. Ngilabangane abanengi koBulawayo kodwa, umdlalo kumele uqhubeke. Ngiwukhangelele.”
Umdlalo lo uzasetshenziswa ngamaqembu womabili ukubona ukuthi aqine kangakanani, andubana ayedlala njalo koweChibuku Super, eRufaro Stadium.
Kuhlandla lakuqala leligi, zadlala ngokulingana, kungela ohlohlileyo. IBosso, eqeqetshwa nguPieter De Jong, ihlezi kunombolo yesitshiya galolunye kungalane yamaqembu eCastle Lager, iphethe imiklomelo engu-35. IDynamos ikunombolo yesi-14, ilemiklomelo engu-33.
Kukhangelelwe ukuthi inkundla yeBarbourfields igcwale phamu, kube litshebetshebe likaTshangane.
Enkambeni kaKaindu kuzakhangelwa abadlali abatshisayo kulezinsuku abagoqela ukaputeni u-Emmanuel Jalai, ovela kuyadlala kumaWarriors akade eseSouth Africa kumaWorld Cup qualifiers. Abanye abadlali nguDenver Mukamba loShadreck Nyawa, owakhulela koBulawayo.
Kuqembu leBosso, kuzabe kuvuke khwatshu unozinti u-Ariel “Mangoye” Sibanda, kuphinde kuvele u-Andrew Mbeba. Phakathi laphakathi kwenkundla kuzabe kukhokhela uMelikhaya Ncube, Never Rauzhi loMason Mushore abadinga ukuthi bahambise ibhola phambili lifike enyaweni zikaBenjamin “Ndlangamandla” Oluwarotimi Adeogun. Umgadli lo udabuka eNigeria njalo amathemba okuhlohla akuye.
Imidlalo ngeviki lesi-31
Yadah v ZPC Kariba (Heart Stadium), FC Platinum v TelOne (Mandava), Bikita Minerals v Herentals (Gibbo), Highlanders v Dynamos (Barbourfields), Triangle v Chicken Inn (Gibbo), Ngezi Platinum v CAPS United (Baobab), Scottland v MWOS (Rufaro), GreenFuel v Kwekwe United (GreenFuel Arena).
