Online Reporter
KUKHONJWA abanye “omalume” abathutha izingane zezikolo eMshwathi ngokwanda kwesibalo sabafundi abatshiya isikolo ngenxa yokukhulelwa.
Minyaka yonke siyakhula isibalo sabafundi abaphumayo ezikolo zakulindawo, ngenxa yokukhulelwa. Lokhu kuvezwe nguSodolobho walindawo uMnumzana Mandla Zondi, ngesikhathi elengxoxo ekhethekileyo lentatheli, ngemva komcimbi wokuklonyeliswa kwezintatheli lamaziko ezindaba ahlukeneyo ngokusebenzisana okuhle lomkhandlu wayo.
Lumcimbi ubuwenzelwe eHof Hotel, khona eMshwathi ngoLwesihlanu. UZondi uthe banengi abafundi abatshiya isikolo kanti esikhathini esinengi kutholakala ukuthi inengi labafundi likhuleliswa ngabatshayeli bezimota eziqatshelwe ukubahambisa ezikolo
“Kuyadumaza lokhu ngoba laba bantu kulindeleke ukuthi kube yibo abavikela izingane, kodwa yibona abaphenduka izigilamkhuba eziqhoqhobala izingane.
“Sinxusa abazali ukuthi bahlale ngokubheka ukuthi izingane zabo ziyafika yini ezikolo ngoba kuyabonakala ukuthi imikhuba eminengi igilwa ngesikhathi sokufunda,” kuchaza uZondi.
Uthe enye inkinga ekhona kule ndawo, yikwanda komkhuba wokusetshenziswa kwezidakamizwa.
“Kulabantu abaziwayo ukuthi bathengisa izidakamizwa, futhi bazithengisela izingane zesikolo. Akulungile lokho ngoba kuwukubulala imfundo yezingane zethu. Ngikhuthaza imiphakathi labezinhlaka zezokuphepha ukuba basukume, kuliwe lalesi sihlava.
“Abantu abagila lo mkhuba kufanele babikwe ezinhlakeni ezifaneleyo ukuze babhekane lokutshutshiswa, bagwetshwe ngokubulala ikusasa lezingane,” utsho njalo. —Ilanga
