Online Reporter
Ugwalo lulotshwe nguTommy Matshakayile Ndlovu lo Doris Nomathemba Ndlovu belo Bekithemba Sodindwa Ncube,
Kwakuthi kungaqedwa ukungcwatshwa abantu babuyele ngekhaya. Abafelweyo bengakangeni endlini, babemelela ukuza hatshuliswa umeluleko ukuze bangene endlini badle. Abantu babengadli kungakangcwatshwa. Umeluleko kwakungumuthi ohlanganiswe lochago. Umuntu wayehabula akhafule, aphinde ahabule aginye.
Abanye abangasi zihlobo bona babefica amanzi entubeni nxa kungela mfula ogelezayo eduze. Nxa kulomfula ogelezayo eduze babethatha intelezi labo msuzwane bayegeza khona babuye babuyele ngekhaya.
Nxa kungala mfula babefica amanzi afakwe intelezi lomsuzwane entubeni okuthiwa kuxotsha umoya wokufa. Bangageza sebengena ngekhaya osekubaswe khona umlilo. Kuzakosiwa inyama yenkomo le ebiphelekezela ofileyo.
Ngemuva kokuphela komsebenzi wokungcwaba kumele kuthathwe yonke impahla esetshenziswe lapha; amakhuba, amafotsholo, amapiki, izimbo, konke-nje okusetshenzisiweyo, ibuthelelwe ngaphansi kwesiphala, ihlale khonapho ingathintwa muntu kuze kufike usuku ezageziswa ngalo.
Kwezinye izigaba kuthi kungaphela umsebenzi wokungcwaba kube lamadoda azalala khonapho engcwabeni kuze kuphele insuku ezintathu. Alala khonapho ebase umlilo. Lokhu kuthiwa yikulala emahlahleni.
Isiko leli elokulala emahlahleni kuthiwa lenzelwa ukwenqabela abathakathi ukuthi bangaphandi isidumbu. Ngemuva kwensuku ezintathu kukhunjulwa ukuthi umuntu uyabe esebolile ngakho kungeke kubasize abathakathi ukugebha umuntu osenjalo. Kwezinye indawo kuvukwa ekuseni kuyiwe khangela ingcwaba abantu bengakavuki.
Ukuzila — Nxa kufiwe ekhaya lapha indlela okwakuzilwa ngayo kwakusiya ngokuthi ngubani ofileyo.
Uma kufe ubaba , umama wayezila ngale indlela. Okwakuqala yikho ukugelwa kwenwele zonke.
Ngemuva kwalokho uzathatha imisisi yakhe, yizigqoko zakhe lezo phela, ayigqoke eyiphendulele ethethe okwangaphakathi wakusa ngaphandle.
Sekuzathathwa ibhetshu likababa, umkakhe phela, kusikwe kulo uzwezwe. Uzwezwe lolo uzabopha ngalo ebusweni abhodise ikhanda. Kuzakuthi nxa egeza angaze agcoba amagcobo, ahlale emhlophe-nke, kukhanye ukuthi ngumuntu ohluphekileyo.
Uzahlala enje-ke umfelokazi aze aguquke kulesi simo mhla umkakhe esebuyisiwe. Umuntu uza abuyiswe sekuphele umnyaka. Ngalesi sikhathi umfelokazi esazilile wayengavunyelwa ukuhlangana lesilisa.
Kwakumele azile indoda, umkakhe aze abuyiswe. Lokwethekelela indawo wayengavunyelwa.
Nxa kufe umfazi, indoda yona yayizila kanje: Ezandleni lenyaweni yayigqiza intambo ezelukwe ngemizi. Ekhanda lapha yayibopha ngozwezwe lwesikhumba esingelaboya.
