Online Reporter
Nkosilathi Sibanda
UGATSHA lwe-Lands, Agriculture, Fisheries, Water and Rural Development kuHulumende luzasungula uhlelo lokulima olweNtwasa/Pfumvudza esigabeni seNsiza, esabelweni seMatabeleland South ngoLwesihlanu.
Kumkhosi lo kunxuswe abalimi abavela endaweni ezitshiyeneyo elizweni kunye lengatsha lamabhizimusi aphathelane lezokulima. Kukhangelwe njalo ukuthi kwethulwe amalungiselelo okulima lonyaka kuzo zonke izigaba zelizwe.
Umhlonitshwa omkhulu kuzabe kunguMphathintambo wogatsha lwe-Lands, Agriculture, Fisheries, Water and Rural Development uDokotela Anxious Masuka.
Ukusungulwa kweNtwasa/Pfumvudza kuza ngesikhathi uDkt Masuka ebike ukuba inhlanyelo, ifethalayiza lokunye okudingakalayo ekulimeni kuPresidential Inputs Scheme kuzanikezwa abalimi kusukela kuliviki.
Kusenjalo, umqondisi omkhulu kugatsha lwezokulima eMatabeleland South uNkosikazi Shupikai Sibanda ubike ukuba bafuna ukuthi kube labalimi abanengi abazaphatheka kuNtwasa/Pfumvudza lonyaka.
Uthe okwakhathesi, ngaphansi kweNtwasa, eMatabeleland South sekulungiswe indima ezifika-259 931 njalo bakhuthaza abalimi ukuthi bafake inhlanyelo elenhlamvu ezincane.
“Kumkhosi wokusungula iNtwasa/Pfumvudza abalimi beNsiza lakwezinye indawo bazakhuthazwa ukuthi balime ngokuzimisela. Sifuna ukuthi kungene abalimi abanengi kulohlelo ukuze sibe lesivuno esihle. Kuzagcizelelwa ukuthi kufakwe inhlanyelo yesiNtu,” kubika uNkkz Sibanda, ekhuluma lephephandaba likazulu ngoLwesine.
Uthe ulethemba lokuthi uhlelo lweNtwasa/Pfumvudza luzaphakamisa abalimi.
“Skhuthaza abalimi ukuthi baqhubeke ngokulungisa indima zabo njengoba isikhathi sezulu sesifikile. Ngokuphatheka okuqinileyo kwabalimi kunye losekelo oluvela kunhlanganiso ezifana leZimbabwe National Army, uhlelo lwePfumvudza lukhangelelwe ukuguqula impilo zabantu eMatabeleland South.”
