admin
Msilisi Dube
LAMHLANJE inzalo yakuleli ithakazelela usuku lokuzalwa kweqhawekazi lakuleli njalo enguNkosikazi kaMongameli welizwe uDokotela Grace Mugabe.
UDkt Mugabe wazalwa mhlaka 23 Ntulikazi ngomnyaka ka-1965 okutsho ukuthi lonyaka wenelisa iminyaka engamatshumi amahlanu.
UDkt Mugabe ongumkhokheli weWomen’s League kubandla leZanu PF wakhethwa nyakenye ngenyanga kaMpalakazi ukuthi akhokhele omama.
Idili lokuthakazelela usuku lokuzalwa kweqhawekazi leli lizaqhutshwa emzini wakhe esigodlweni eHarare.
Izizalwane zakuleli ezikhulume loMthunywa zithe zithabe zimanzi nte ngokuthola ithuba lokuthakazelela usuku lokuzalwa kukaDkt Mugabe njalo bamfisela impilo ende.
Omele uHulumende esabelweni seMatabeleland North uKhomuredi Cain Ginyilitshe Mathema uthe uthabe kakhulu ngakho ufisa ukuba iqhawe leli likhule lize likhokhobe.
“Eqinisweni ngithabe okwamagama ngosuku lokuzalwa kukamama ngoba uyisibonelo esihle emphakathini. Kungakho-ke thina njengabantwabakhe esabelweni seMatabeleland Noth simenzela amhlophe.
“Umama wasisungulela iphurojekithi yokulima eBinga ngakho siyakukholwa ukuba iphurojekithi le izathuthukisa impilakahle yethu.
“Ngenyanga kaMpandula i-irrigation le iyabe iqala ukusebenza ngakho konke sekulungile. Konke lokhu yimizamo yakhe yokuthuthukisa abantu esabelweni seMatabeleland,” kuchasisa uKhmrd Mathema.
Uqhubekele phambili wathi inzalo yonke yakuleli kumele ifunde okuhle okwenziwa nguDkt Mugabe.
“Umama ngumuntu othanda izinto eziqondileyo ngakho simfisela inhlanhla empilweni yakhe ukuze akhule aze akhokhobe eqhubeke njalo efeza ubuqotho bakhe, ” kuphetha uKhmrd Mathema.
UDkt Mugabe ngumuntu olothanda njalo olesihelo labantwana abancane. Khathesi ulendawo lapho okugcinwa khona abantwana abazintandane eMazowe njalo uyabafundisa ukuze babe lekusasa enhle.
Online Reporter