admin
Msilisi Dube
KULEQULA lamanina angu-25 elidabuka eMasenyane eLupane eselisungule iphurojekithi yokwenza amakhandlela kunye lesepa njengendlela yokuziphilisa.
Iphurojekithi le ebizwa ngokuthi yiMother’s group kubikwa yaqala ngomnyaka ka-2007 kodwa ngenxa yokusweleka kwemali kwabanzima ukuba bathuthuke.
UMthunywa uxhumane lo Nkosazana Sandra Mpofu olilunga kuqembu leli waveza ukuba basungula iphurojekithi le ukuze belwisane lodubo lwendlala.
“Indlala ibhahile kulumango ngakho sahlala phansi njengabomama saphuma lecebo lokusungula iphurojekithi le ngemva kokufundiswa ukwenza isepa lamakhandlela yinhlanganiso ebizwa ngokuthi yiSelf help.
“Imithi yokupheka amakhandlela la kunye lesepa siyithenga koBulawayo kodwa impahla zethu sizithengisa khonapha eLupane. Ezinye impahla esiziphekayo zibalisa iVaseline leCamphor.
“Okunye esikwenzayo kuphurojekithi yethu yikuthunga ingcebethu, amacansi kunye lama-re-usable pads. Sabona ukuthi ukuhlala phezu kwezandla akuncedi ngakho sasesisungula uhlelo lolu,” kulandisa uNkszn Mpofu.
UNkszn Mpofu uthe uhlupho ababhekane lalo ngolokuswela indawo lapho abangathengisela khona impahla zabo.
“Impahla lezi silazo zinengi kodwa siswele lapho esingathengisela khona. ELupane ibhizimusi yethu alihambi kuhle ngakho sikhangelele ukuba siyezithengisa koBulawayo kunye lakwezinye indawo ukuze sikhulise ibhizimusi lethu.
“Impilo yalamuhla inzima ifuna umuntu okhutheleyo njalo okwazi ukusebenzisa izandla zakhe ukuze engabulawa yindlala,” kuphetha uNkszn Mpofu.
Online Reporter