Online Reporter
YiNtatheli kaMthunywa
Izidumbu ezingamatshumi amabili lane sezitholakele eLake Kariba ngemva kokuba kubhewuke isikepe ebesithwele abantu abanengi ngoLwesibili.
Izidumbu lezi zitholwe ngoLwesithathu ekuseni ngamalunga eZimbabwe Defence Forces kanye leZimbabwe Republic Police asebenza ezigabeni zokuntsheza ngaphansi kwamanzi, ngesikhathi kuqhubeka umsebenzi wokudinga lokuhlenga, kutsho iJoint Operations Command.
Ukutholakala kwezidumbu lezi kwenze inani lezidumbu esezitholakele kulingozi lafika ku-37, kulandela izidumbu ezingu-13 ezaziqinisekiswe ngamapholisa ngaphambilini.
Umsebenzi wokudinga lokuthola izidumbu uyaqhubeka, njengoba iziphathamandla zizama ukuthola ubukhulu obupheleleyo bengozi le.
Kusenjalo, iZimbabwe Republic Police ithe ekuqaleni izidumbu ezingu-13 zasezitholakele, kwathi abantu abangu-67 basindiswa basebesiwa eMahombe-kombe Primary School Command Centre ukuze bathole ukwelatshwa lokunye ukunakekelwa.
Amapholisa athi kusaqhubeka ukuhlolwa ukuze kutholakale inani eliqondileyo labantu ababesesikepeni ngesikhathi sengozi.
Amapholisa athi isikepe lesi sasivunyelwe ukuthwala abantu abangu-90, kungabalwa amalunga amahlanu ezisebenzi zesikepe. Kodwa uphenyo lukhomba ukuthi kungenzeka ukuthi sasisithwele abantu abanengi kulalokho.
Ulwazi lokuqala olwanikwa ukaputeni wesikepe lwaluveza ukuthi abantu abangu-120 — abadala abangu-108 labantwana abangu-12 — babehamba besuka eKariba besiya eChalala.
Iziphathamandla kulindeleke ukuthi zinikeze olunye ulwazi njengoba umsebenzi wokudinga lokuhlenga uqhubeka.
Kusenjalo uMongameli Mnangagwa usememezele ingozi yesikepe eKariba ukuba yinhlekelele yesizwe, njengoba umsebenzi wokudingisisa lokuhlenga uqhubeka ngemva kokubhewuka kwesikepe lesi eLake Kariba.
