admin
Thokozile Mbedzi
ZILOKHU zibabaza izakhamizi zesigabeni seNgoma eGwanda ngamasela enkomo asephinde avumbuluka kulandela ukutholakala kwenkomo ezingu-17 ezitshontshiweyo kwenye insimu kuviki ephelileyo.
Kubikwa inkomo zitholakale emulini yakoTomson emasimini .
Ekhuluma lentatheli kaMthunywa uMnumzana Bakang Sebata uthe balokudana okukhulu ngamasela enkomo alokhu eqhubekela phambili.
“Silokudana ngobusela obulokhu buqhubekela phambili ngemva kokuba kuke kwabotshwa amasela enkomo lapha.
“Simangele sibona amadoda eBotswana efika lapha edinga inkomo zawo lathi sahle sasukumela phezulu sabikela amapholisa labo abasixhasileyo.
“Umzila wenkomo lezo siwulandele waze wayasifikisa koThompson. Inkomo lezo zazitshontshwe zingu-42 kodwa kutholakale ezingu-17 zifihlwe emasimini ezinye akwaziwa ukuthi zafihlwa ngaphi,” kulandisa uMnu Sebata.
Omele isikhulumi samapholisa esabelweni seMatabeleland South uSergeant Thandolwenkosi Moyo ebuzwa ngodaba lolu uthe solufikile ehofisini yabo.
“Amapholisa achwayisisa ngodaba lwenkomo ezitshontshiweyo ezitholakele kwenye insimu. Inkomo lezo kubikwa zazingu-42 kodwa kutholakale ezingu-17 zisensimini yenye indoda.
“Sicela uzulu ongabe elolwazi lokuthi ezinye zalezi inkomo zingaphi abikele amapholisa aseduzane laye ukuze lowo odale leli icala ajeziswe,” kuphetha uSgt Moyo.
Online Reporter