admin
Ethel Ncube
AMAPHOLISA akoBulawayo asekhuthaze abazali ukuthi baqinise imithetho emakhaya abo njalo bahlale besazi lapho okulabantwababo khona.
Isikhulumi samapholisa akoBulawayo ulnspector Abednico Ncube wethule inkuthazo le kulandela ukwedlula emhlabeni kwabantwana ababili belokitshini leCowdray Park abagalula kwelinye igodi elilamanzi.
Uthe amapholisa akhathazekile ngabantwana besikolo ababonakala bebhoda ezitaladeni edolobheni begqoke ama-yunifomu ilanga lize liyetshona.
UInsp Ncube uthe abazali balomlandu wokuthi banike abantwababo umthetho oqinileyo futhi bahlale besazi ukuthi abantwababo bangaphi kukanti nxa kuyikuthi bayadlala kumele babone ukuthi badlalela endaweni ephephileyo.
“Kulezinsuku kulabantwana bezikolo ezimbalwa abafika babuthane ku 3rd Avenue lakoHaddon Sly baqale ukulwa kukanti abanye njalo bayabe besehla besenyuka lezitalada.
“Abazali kumele banike abantwana isikhathi sokufika ngekhaya ngoba bayabe besazi ukuthi baphuma sikhathi bani esikolo. Ukungaphi abantwana umthetho yikho okwenza batshone begcwele idolobho lonke bacine bephatheka ezintweni ezingaqondanga,” kuchasisa uInsp Ncube.
“Umzali lomzali kumele aziphe umlandu wokuhlala phansi labantwabakhe abaphe umthetho oqinileyo ukuze umntwana nxa etshayisa esikolo aqonde ngekhaya angadluli kwezinye indawo,” kutsho uInsp Ncube
Uphethe ngokuthi abazali abasebenzisane lababalisi ukukhangela abantwana.
“Lezinsuku abantwana bangena baphinde baphume esikolo ngezikhathi ezehlukeneyo kungakho umzali kumele abekwazi izikhathi zokungena lokutshayisa zomntwana (i-timetable).
“Lokhu kuzakwenza njengomzali ukwazi ukuthi nxa efika endlini ephuzile kuyini okumphuzisileyo,” kuphetha ulnsp Ncube.
Online Reporter