Online Reporter
Ethel Ncube
AMAPHOLISA akoBulawayo athanda ukwazisa uzulu olesihlobo angasiboniyo ukuba avakatshele amapholisa eNkulumane ngoba kutholakale isidumbu somuntu sindenda emanzini emfuleni uPhekiwe ngoMvulo koBulawayo.
Isidumbu lesi sitholwe ngowesifazane oleminyaka engu-37 akade esiya emasimini wabona isidumbu sindenda emfuleni uPhekiwe. Umuntu lo ngowesilisa njalo ubegqoke isikipa esimnyama, ibhulugwe eliyikhofi lelinye elifitshane eliyisibhakabhaka. Engalweni ule-tattoo kusandla senxele lenwele ezimnyama.
Isidumbu sikamuyi sisesibhedlela se-United Bulawayo Hospitals lapho esihlolwa imbangela yokufa.
Intatheli ixhumane lesikhulumi samapholisa akoBulawayo uInspector Nomalanga Msebele obike ukuba indaba enjalo isezandleni zamapholisa.
“Sicela ongabe elesihlobo sakhe angasiboniyo asicine sigqoke impahla eziqanjiweyo athinte amapholisa eNkulumane kunombolo ezilandelayo 0292-496756 kumbe ahambe emotsha ye-UBH ayekhangela ukuthi kungabe kuyisihlobo sakhe na,” kutsho uInsp Msebele.
