Online Reporter
YiNtatheli kaMthunywa
Amapholisa akoBulawayo aphenya udaba lokuthunjwa komntwana oyinkazana olezinyanga ezine, okwenzakale eNew Parklands.
Isikhulumi samapholisa koBulawayo, uInspector Nomalanga Msebele, uthe isehlakalo lesi senzakale mhlaka 27 Mpalakazi 2025 ngesikhathi unina womntwana oleminyaka engu-26 ebona isaziso kunkundla yokuxhumana yeWhatsApp ebizwa ngokuthi “Idale labomama,” ayengene kuyo kunyanga ezine ezedluleyo, lapho okwakulombiko wokuthi labo abadinga usizo lwempahla zabantwana kumele bathinte inombolo enikeziweyo.
Uthe inina leli lathumela umlayezo kuWhatsApp laxoxa lomuntu owazithi nguMaNdlovu, njalo uhlala eCowdray Park, owabuye wathi uzamphathela impahla endlini yakhe. Inina lelo lamlayela ukuba afike njani lapho ahlala khona.
U-Inspector Msebele uveze ukuthi mhlaka 29 Mpalakazi ngehola lika-6 ekuseni, umetheswacala wathumela umlayezo etshela inina lelo ukuthi uzaletha impahla ngalelolanga. Kuthe ngo-1 emini, umetheswacala walaya inina leli ukuthi limlinde ekhoneni kuHarare Road loCecil Avenue, eParklands, koBulawayo, ukuze athathe impahla.
Uthe inina leli, lathatha iwele elilodwa elilenyanga ezine, latshiya lo owathunjwayo elele kunye lomunye oleminyaka emine edlala phandle wayalinda inina lelo.
Ngemva kokulinda imizuzu engaba ngu-15, inina lelo lamukela umlayezo ovela kumetheswacala esithi usethumele umuntu obizwa ngokuthi nguLo, ongazange afike.
Ekufikeni kwakhe ngekhaya, uInspector Msebele uthe inina leli lafica umntwana esetshontshiwe wahle wayabikela amapholisa aseduzane.
Uxwayise omama kunye lalabo abakhangela abantwana ukuthi baqaphele nxa bexoxa labantu abangabaziyo kunkundla zokuxhumana lokuthi bangaze babatshela imfihlo ngempilo zabo.
