marble nkomo
YiNtatheli kaMthunywa
KULABOMAKOROKOZA ababili abafe kulandela ukudutshukelwa ngamahola bephakathi emgodini, eLong Fortune Mine, eCollen Bawn eGwanda.
Isikhulumi samapholisa esabelweni seMatabeleland South, uInspector Chiratidzo Dube, uqinisekise ngesehlakalo lesi, wathi uphenyo lusaqhubeka.
Uthe sekubotshwe isizalwane seChina, uJing Yi Zhang, 50, ngokuthinteka kulelicala.
U-Insp Dube uthe isehlakalo lesi senzakala mhlaka 3 Mabasa, 2026, ngo-10:00 ekuseni lapho uZhang, ohlala emgodini lo, asolwa ngokuthi kudutshulwe amahola ngesikhathi izisebenzi ezimbili, uProsper Nango (31) weMpopoma koBulawayo lo-Aleck Hove (30) weMbizo 3 eKwekwe bephansi emgodini.
“Laba ababili babeyingxenye yethimba labahlanu ababengene emgodini ekuseni ngalolo suku,” kutsho yena.
Ngokutsho kwamapholisa ngama 02:00 uNkosiyazi Ncube (30) wesiqinti seNkayi, u-Ishmael Fodi (28) wesiqinti seBinga, u-Emmanuel Nyathi (27) wesiqinti seGwanda, uProsper Nango kanye lo-Aleck Hove baqala umsebenzi kuShaft Seven, okungaba ngamamitha angu-160 phansi emgodini.
Behliswa phansi kwasala otshaya ucingo yedwa phezulu uTinevimbo Maphosa (26).
Ngesikhathi bephansi kubikwa bagebha amagodi angu-51 bafaka intambo zamagetsi belungiselela ukudubula.
Ngo 10:00, uNyathi waphuma emgodini elandelwa nguNcube loFodi, batshiya uNango loHove beqedisa ukuxhumana kokugcina emgodini.
“Ngesikhathi uNcube loFodi befika phezulu, ngaphambi kokuthi behle ebhakedeni, kwaqhuma emgodini, bavele baphuma babaleka,” kutsho u-Insp Dube.
Otshaya ucingo, uMaphosa, uveze ukuthi uZhang uvule isiqhumane, okubangele ukuthi kudubuke ngesikhathi kulezisebenzi ezimbili phansi emgodini.
Indaba le ibikelwe amapholisa nguMnumzana Aaron Wilson (65) oweLong Fortune Mine, njalo abacuphi beGwanda, abakuhlangothi lweMinerals, Flora and Fauna Unit kanye leZRP Colleen Bawn bafike emgodini lo besiyahlolisisa.
Uphenyo lokuqala luveze ukuthi kulezinye izisebenzi zemgodini ezingene phansi ngaphambi kokufika kwamapholisa zathola ingxenye zemizimba yabantu.
Izikhulu zogatsha olubona ngezemigodini kunye lokuthuthukiswa kwezokwembiwa kunye loMnumzana Brian Matewa (40), zifike kule indawo yesehlakalo zalaya ukuthi ukuthathwa kwezidumbu kuqhutshwe mhlaka 4 Mabasa ngemva kokuthi amagasi ayingozi esephumile emgodini.
U-Insp Dube uthe iLong Fortune Mine (Private) Limited iphethwe yisizalwane seChina, uDialang Gu, olechence elakhitshwa ngoLwezi ngomnyaka ka 2025 futhi elizaphela ngoLwezi ngomnyaka ka 2027.
Online Reporter