Online Reporter
Nkosilathi Sibanda
ABANTWANA besikolo esiqintini seHankano, eLupane eMatabeland North bazaqala ithemu lesithathu lomnyaka ngenjabulo kulandela ukwethulwa kwamakilasi amatsha esikolo seThokoza Primary kulindawo.
Sekwakhiwe amakilasi amatsha kulesi sikolo ngemva kokuba inhlanganiso yeLupane Youth Development Oraganisation (LYDO) ibambane le-Australian Embassy ukudinga usekelo lokuthi kuvuselelwe isikolo lesi.
Abantwana bebefundela phakathi kwamatende, njalo bebehamba imango emide, obekudala ukuthi abanye babo bakhalale ukufunda.
Umqondisi wenhlanganiso yeLupane Youth Development Organisation, uMnumzana Tawanda Mazango utshele iphephandaba likazulu ngoLwesine emini ukuthi bakhangelele ukuthi iThokoza Primary School ivulwe ngethemu elandelayo.
Uthe ngemva kokwakhiwa kwamakilasi, banikeze isikolo kukhansili yalindawo eyeKusile Rural District Council, okuyiyo ezaqondisa inhlelo zonke zesikolo lesi.
“Sibika ngokujabula okukhulu ukuthi sekwakhiwe amakilasi esikolo seThokoza Primary, eHankano, eLupane. Lo kube ngumsebenzi oqhutshwe ngosekelo oluvele kwabe-Australian Embassy besebenza ndawonye lathi kuLupane Youth Development Organisation kunye lomphakathi weLupane, iKusile Rural District Council. Sibonga bonke abazinikelayo kusukela siqala lumsebenzi, saze safika lelibanga.
“Njengoba ithemu yesithathu ivulwa ngoMpandula, labafundi bakulesi isikolo bazavula amakilasi amatsha, bathole imfundo endaweni evikelekileyo, efudumalayo njengabo bonke abantwana kwezinye indawo. Inhloso yethu yikuthi sakhe ikusasa elihle kubantwana beLupane, bengasaleli emuva. Kulilungelo labo ukuthola imfundo epheleleyo,” kutsho uMnu Mazango.
Uthe ukusebenza le- Australian Embassy kudale utshintsho olukhulu oluzaphakamisa imfundo eLupane lokuphucukisa umphakathi jikelele.
“Isinqumo se-Australian Embassy sokuxhasa ngemali lesi sakhiwo sekilasi sitshengisa ukuzibophezela kwabo ekuguquleni impilo lekusasa yabafundi. Lolu hlelo lusekela ngqo isinqumo sikaHulumende wakuleli esokugqugquzela i-Education 5.0 kunye le-Vision 2030.”
UMnu Mazango wengeze ngokuthi amakilasi amatsha la azakwehlisa umthwalo kubafundi lababalisi.
“Isakhiwo samakilasi lesi sisusa umthwalo wabafundi abakuGrade 7, abahamba amakhilomitha angu-7 besiya eGwaai Primary School ukuyaloba imihloliso yokuphela komnyaka. Kusukela ngomnyaka ozayo, abafundi bazabhala imihloliso yabo bekhululekile.
“Okwesikhathi eside, abantwana bebefundela kuzakhiwo ezingalungelanga ukuba ngamakilasi, kubeka impilo zabo engozini. Khathesi sizabona inguquko enkulu ngoba sikhangelele lokuthi impumela yemihloliso lapha esikolo ibengcono. Sibonga uHulumende weZimbabwe, ubukhokheli besigaba, abazali le-Australian Embassy ngokuletha ukukhanya empilweni zabantwabethu.”
