admin
Nkosinathi Sibanda
UMDLALO wenguqu kubikwa lonyaka uzakuba lamaqembu amanengi azadlalela etshebetshebeni, kubika inhlanganiso yalumdlalo ebizwa ngokuthi yi-Beach Soccer Zimbabwe Association.
Inkokheli zalinhlanganiso zibophe isinqumo sokuthi inhlanganiso le iqalise ukukhankasela ukuvuselelwa kwenguqu yetshebetshebe kumaqembu angaphandle kwamaligi amakhulu kanye lasezikolo.
Emhlubulweni ongezansi yelizwe, umdlalo lo usudlalwa eHwange.
Ebika ngalokhu, unobhala weBSZA uChris Nhapi uthe kulandela ukubunjwa kwalinhlanganiso, amalunga abo avumelana ukuthi aqale ukuqhuba inhlelo zabo ezikolo ngoba yikho okulethalenta elisakhulayo.
Inhlanganiso le ikholwa ukuthi izikolo yizo ezizakwamukela kalula inguqu yetshebetshebe.
“Ukusungula kwethu inguqu yetshebetshebe kwamangalisa inengi labantu abafisa ukubona ukuthi ngempela sizimisele ngohlelo lolu. Sahlala phansi sananzelela ukuthi ukuze abantu bathole ulwazi olungcono, kumele siqale ngokufundisa abantwana abasezikolo umdlalo. Ezikolo yikho okulethalenta elingakazali kangako, njalo abantwana balothando lemidlalo emitsha.”
IZimbabwe Football Association ithi iyakujabulela ukusungulwa kwalinguqu.
“Kuyajabulisa lokhu ngoba i-beach soccer yazakala umhlaba wonke. IZifa izazama ukuthi incedise ukuthi umdlalo lo ukhule,” kutsho uXolisani Gwesela isikhulumi seZifa.
Unobhala weBSZA uqhubeke ngokuthi inhlanganiso yabo ayibuyeli emuva ngoba ikhangelele ukuqhatsha umqondisi weFifa uMarcelo Mendes ovela eBrazil ukuthi afundise abaqeqetshi bakuleli.
Kubikwa uMendes usefundise abaqeqetshi abangamatshumi ayisithupha.
Inhloso ngeyokuthi abaqeqetshi laba babhode ezikolo benikeze lababalisi ulwazi.
Phezu kwalokhu uNhapi uthe banxusa unompembe wodumo uSunday Okayi owaba lethuba labonompembe bakuleli.
Inguqu yetshebetshebe idlalwa kabanzi emazweni aseLatin America, ikakhulu eBrazil.
Kulumdlalo akugqokwa izicathulo, ithimu ilabadlali abahlanu njalo abavunyelwa ukutshintsha abadlali okungelamkhawulo.
Abadlali badlala okwemizuzu engu-36 elamahlandla amathathu.
Online Reporter