Online Reporter
Nodumo Moyo
ILIFA lomculi wodumo we-reggae eSouth Africa, uLucky Philip Dube, liqhubeka ngokukhanya ngemva kokuvulwa ngokusemthethweni kweLucky Dube School of Performing Arts edolobheni lakibo e-Ermelo, eMpumalanga, eSouth Africa ngoMvulo.
Isikolo lesi, esivulwe ngokusemthethweni nguMphathi wezemfundo eMpumalanga uCathy Dlamini, sisungulwe ngenhloso yokukhulisa ithalenta labatsha kwezobuciko lokuhlonipha omunye wabaculi abadume kakhulu e-Africa.
Isikolo, esiqanjwe ngebizo likaLucky Dube owazalelwa e-Ermelo ngo-3 Ncwabakazi 1964, sizafundisa abafundi umculo, ukugida, ukulingisa, ukuqondisa imigido, ukukhangisa lokunye okuphathelane lezemidlalo lokuzilibazisa.
Ekhuluma ngesikhathi sokuvulwa kwesikolo, uDlamini uthe sizanceda ekutholeni ithalenta labatsha kanye lokulikhulisa ngendlela efaneleyo.
“ILucky Dube School of Performing Arts izanceda ukuthola, ukukhulisa lokuthuthukisa amathalenta abafundi bethu ngendlela ehambelana lentuthuko yomhlaba kwezomculo lobuciko,” kutsho uDlamini.
ULucky Dube ukhulele e-Ermelo waze waba ngomunye wabaculi be-reggae abadume kakhulu e-Africa, wakhipha amadlalade angu-22 eminyakeni engaphezulu kwe-20 ecula.
Ingoma zakhe ezidumileyo ezigoqela Prisoner, Different Colours/One People, Remember Me, House of Exile kanye le-It’s Not Easy ezazikhuluma ngobandlululo, ubuyanga, ukungalingani, ukuthula lamalungelo abantu.
UDube wayethandwa kakhulu laseZimbabwe, lapho ayeke ezocula khona phambi kwezinkulungwane zabalandeli. Umculo wakhe waqhubeka ukhuthaza abaculi be-reggae eZimbabwe.
Ilifa likamufi liyaqhubeka ngeLucky Dube Band ekhokhelwa yindodana yakhe uThokozani “TK” Dube, oqhubeka ecula ingoma zikayise emazweni amanengi omhlaba.
