Online Reporter
Nkosilathi Sibanda
UMPHAKATHI wesigabeni seGwanda, esabelweni seMatabeleland South usuqalisile ukwenza umkhankaso wokuqinisekisa ukuthi ulimi lwesiTjiZhawunda luhlonitshwa njengezinye indimi ezikhulunywa kuleli.
Ulimi lolu, kukhangelelwe ukuthi lukhulunywe emsakazweni, ngokutsho kukamsekeli kaMphathintambo wogatsha lwe-Information, Publicity and Broadcasting Services uDokotela Omphile Marupi.
UMarupi uphinda abe ngummeli weGwanda South ePhalamende. Uthe baphakathi kohlelo lokuvuselela imikhuba lamasiko ayekhona eGwanda.
“Ngokuvumelana lamazwi kaMongameli Mnangagwa okuthi kungatshiywa muntu emuva, ngikhuthaza ukwethulwa kolimi lwesiTjiZhawunda.
“Sixhumane labakhokheli bomdabu labantu bendawo ukuze basisize ekulandeleleni imbali yolimi lwesiZhawunda.
Kwenziwa uhlelo lokuhlola indimi, kwatholakala ukuthi ulimi lolu lukhulunywa endaweni ezinengi ezigoqela eGaranyemba, Ntepe, Sengezane, Samlodi, eBethel laseBuvuma leSelonga,” Dkt Marupi.
Kusiya phambili, kubikwa ulimi lwesi-TjiZhawunda luzakuba yingxenye yendimi ezikusisekelo sombuso welizwe ezabisela isiNdebele, Chewa, Chibarwe, English, Kalanga, Koisan, Nambya, Ndau, Shangani, Shona, sign language, Sotho, Tonga, Tswana, Venda, lesiXhosa.
“Ulimi lolu lwaziwa ngabadala. Intsha ngeke izwisise nxa bekhuluma. Ngakho-ke, sihlose ukuthi ulimi lukhulunywe emsakazweni,” kutsho uDkt Marupi.
