shloboe boe
Lovemore Dube
INTSHANTSHU zokugijima zizahlangana eBindura, esabelweni seMashonaland West ngoMgqibelo kumncintiswano wokukhetha abazakuba ngamalunga eqembu elizamela ilizwe kumaWorld Athletics Championships, eFlorida, eMelika ngoZibandlela.
Ophethe ugatsha lwezemincintiswano kunhlanganiso yeNational Athletics Association of Zimbabwe (Naaz), uManuel Mpofu uthe zonke izabelo ezilitshumi zelizwe zizathumela abagijimi kulumncintiswano. Uthe imidlalo le ilesisindo esiphezulu ngoba intshantshu zonke zizagijima ndawonye zimele izabelo zazo.
“Ngiyathokoza ngoba izigaba sezithumele abancintisa eBindura. Okuthokozisayo yikuthi zonke izigaba ziqinisekise ukuthi zizancintisa. Kukhanya kuzakuba ngumncintiswano ozwayo,” kutsho uMpofu.
Umsekeli kamongameli weNaaz uSiphathisiwe Machaya ubike ukuthi amalungiselelo asesezingeni eliphezulu, sekulindwe ilanga langoMgqibelo.
“Bengikhonale eBindura ngoMgqibelo ngiyekhangela ukuthi amalungiselelo akusiphi isigaba. Ngithokozile ngoba kusetshenziwe, sekulindwe lona ilanga lomncintiswano,” nguMachaya lo.
UMachaya uchaze njalo ukuthi ngoMgqibelo bazaqhuba umkhosi wokunikeza izicoco kulabo abenze kuhle.
“Sikhangelele ukuthi ngemva kokugijima sizakuba lomkhosi wemiklomelo ezaphiwa abagijime okukhwabithekayo ngo2025. Sizahlonipha labaqeqetshi lezigaba ezenze kuhle.”
UTapiwanashe Makarawu ukhangelelwe ukuthi angathatha isicoco kwabesilisa, kuthi uVimbai Maisvoreva athathe kwabesifazane. Izabelo zakoBulawayo, Harare leMashonaland West yizo izigaba ezingaphiwa isicoco sokuphakamisa umdlalo ngo2025.
Abazakhethwa ngemva komncintiswano wangoMgqibelo bakhangelelwe ukuthi bazaya eMelika ngoZibandlela 2025 bayencintisana labagijimela amanye amazwe.
NgoMbimbitho kuzakuba lamaWorld Relays eBotswana lapho iZimbabwe ekhangelelwe ukuthumela amaqembu e-4 x100, 4 x400m le-mixed.
Online Reporter