Online Reporter
YiNtatheli kaMthunywa
AMAPHOLISA akoBulawayo asecele umphakathi ukuthi uphathise kumsebenzi wokudinga umntwana, u-Asanda Charisma Ndhlovu, oleminyaka emibili yokuzalwa, otshontshwe enzikini yedolobho.
Utshontshwe ngenye indoda e-Meikles Mall izolo ekuseni.
Imuli ka-Asanda ibika ukuba ithole umbiko wokuthi umntwana engabe eseNtumbane kodwa kayizange ithole lutho lapho.
“U-Asanda ulemnyaka emibili kuphela, usemncane njalo umsulwa, futhi kumele abe lomdeni wakhe. Sicela uzulu avule amehlo, aqaphele njalo abike loba yini engasinceda. Isikhathi siqakatheke kakhulu kuloludaba. Kasisoze siphele amandla lethemba,” kutsho uSandisiwe Sibanda oyisihlobo.
“Sifike eNtumbane lamapholisa kodwa kasitholanga lutho. Sesibhode zonke indawo esingazicabanga, sakhuluma labantu kodwa akuphumi lutho,” kubika ubabazala ka-Asanda.
“Siphelelwe. Nxa ekhona ongabe elolwazi oluthile, sicela asincede. Loba yiwuphi umkhondo uzasiphathisa.”
Isikhulumi samapholisa koBulawayo u-Inspector Nomalanga Msebele uthe baphezulu kokudinga umntwana lokwenza lonke uphenyo ngaloludaba.
“Siyaqhubeka ngokuchwayisisa kwethu kodwa kasikatholi udletshana oluqondileyo ngalapho umntwana akhona. Kusenjalo, abemuli kunye lomphakathi baqhubeka bedinga usizo olungancedisa ukuba kutholakale u-Asanda.
“U-Asanda uleminyaka emibili nje, mncane futhi kazi lutho kumele abe labangakibo. Sicela umphakathi uvule amehlo, akhangelisise lapho abakhona nxa kukhona abakusolayo babikele amapholisa ngokungancedisa masinya.
“Isikhathi siqakathekile njalo ngeke silahle ithemba,” kutsho uSibanda.
