Online Reporter
Ethel Ncube
INKAMPANI yeCapital Foods koBulawayo inxusa abalimi abafuya inkukhu zamaqanda lezenyama ukuba babuye bezokwabelwa ulwazi ngokugcinwa kwenkukhu ngoLwesihlanu langoMgqibelo koBulawayo.
UMnumzana Itai Matereke, oyingcitshi kwezokufuywa kwenkukhu njalo esebenza eCapital Foods, uthe kubalulekile ukuthi abalimi babe lolwazi ngokufuya inkukhu ikakhulu ngesikhathi somqando ngoba umlimi elakho ukufelwa yisilugu sonke nxa engelalo ulwazi.
“Inkukhu zilakho ukufa zibulawa ngumqando kungakho abalimi kuyadingeka ukuthi babe lolwazi oluzabenza bakwazi ukunakekela kuhle inkukhu zabo ukuze bangalahlekelwa.
“Sizabe sifundisa abalimi ngokufuya inkukhu zamaqanda ngoLwesihlanu, mhlaka 23 Nkwenkwezi kuthi ngoMgqibelo sizafundisa abafuya inkukhu zenyama ama-broiler.
“Izifundo lezi zizakwenzelwa eCapital Foods, ku 105 Plumtree Road Belmont kungelambadalo,” kutsho uMnu Matereke.
Ubuye waveza ukuba abalimi bazathola izifundo ezitshiyeneyo.
“Abalimi bazathola isikhathi sokuba bazane labanye abalimi abafuya inkukhu, babelane ulwazi.
“Kuzabe kulodokotela wezifuyo ozabe ebafundisa ngemikhuhlane etshiyeneyo lokuba bazi ukuba yelatshwa njani ngoba yiyo evame ukuhlasela inkukhu zabalimi,” nguMnu Matereke lo.
Uphethe ngokuthi abafuyi abazathola izifundo lezi bazanikwa izithupha eziveza ukuba baqeqetshile ekufuyeni inkukhu.
