shloboe boe
Brandon Moyo
ABAFANA bekhilikithi abakhethwe kuqembu lamaChevrons ukuthi bayedlala leNgilandi balenhlanhla njalo baphethe amathemba elizwe ukuthi badlale kuhle.
Inhlanhla abalayo yikuthi ngabokuqala ukwethekelela eNgilandi ngemva kweminyaka emibili. AmaChevrons acina ukunyathela eNgilandi ngo-2003. Bazadlala lequla leNgilandi elihlonitshwa kakhulu emdlaweni. Kuhlelwe imidlalo yeTest emine, enkundleni yeTrent Bridge ngoLwesine.
Umdlalo lo, ngokutsho kwabacubunguli bekhilikithi, ubaluleke kakhulu kumbali yalumdlalo kumaChevrons layo iNgilandi. Kuzakhangelwa ukuthi iZimbabwe iqine okunganani ukumelana lelizwe elibalelwa phakathi kwentshantshu emhlabeni wonke.
Kodwa kumele amaChevrons alolonge okuzwayo, ngokutsho kuka-Alistair Campbell, owake wabangu kaputeni weZimbabwe. Ekhuluma leSky Sports Cricket Podcast kuliviki, uthe amaChevrons kumele abekezele, avume isimo akuso.
“Angiboni ukuthi kungaba yinto embi nxa iZimbabwe inganqoba i-toss, ibisijika ibhola kuqala,” nguCampbell lo.
“Okungafunakaliyo yikuthi bazibone beku-30 for 5 ekuseni eTrent Bridge ngoba yindawo enzima leyo. Ukuvimba akusinyathelo elibi njalo kalitshengisi ukuba buthakathaka. Kabadonse umdlalo okwamalanga amane, besebethola isu lokunqoba khonapho.”
Uthe ubona iqembu eliqinileyo kumaChevrons ngakho ulokukholwa ukuthi bengenza ngcono loba kungela obacabangela okuhle eNgilandi.
Ukhethe abadlali abathathu, uBlessing Muzarabani, Richard Ngarava loVictor Nyauchi, esithi yibo abakhangelelwe ukuthi bakhokhele iqembu.
“Laba ngibathembile ukuthi bajiyile enkundleni. Kodwa, kangiboni betshaya i-spinner, hatshi eNgilandi lasemdlalweni wamalanga amane.
“UMuzarabani usebelomdlalo omuhle, kodwa kumele aphakame.UNgarava usebenzisa isandla sokunxele njalo uyenelisa ukujika ibhola ngomfutho. UNyauchi ulesiphiwo sokubhodisa ibhola,” nguCampbell lo.
Ekujikeni ibhola, iZimbabwe ithembele kuBrian Bennett, Ben Curran, Sean Williams, Craig Ervine loSikandar Raza.
“UBennett uyakuthanda ukuvula njalo kesabi lutho. UBrendan Taylor uke wakhuluma labafana bengakasuki, ebalimukisa indlela abadlala ngayo nxa belapha, kayisebenzi eNgilandi ngoba bengakhitshwa ngokuphangisa ku-third slip Nottingham. Ulwazi olunje lubalulekile.
“UBen Curran uyasebenza. Usekhulile njalo uyitholile indawo yakhe eqenjini. Singafaka uWilliams, Ervine loRaza ngabadlali asebelesikhathi besemdlalweni.”
UBrendon McCullum oweNgilandi utshele iBBC Radio 5 Live Cricket Show ukuthi umnyaka ka2025 umkhulu kukhilikithi yeNgilandi.
“Sifuna ukuguqula iqembu, likhuphuke, libalelwe kulawo adlala kuhle.”
UMcCullum wangena emsebenzini wokukhuza ngo-2022, wafika ngokutshintsha indlela iNgilandi edlala ngayo. Selinqobe kumidlalo engu-22 phakathi kwe-35.
“Senza kuhle. Khathesi kumele siphakamele phezulu. Akula elinye ithuba elinje.”
Uqhubeke wathi: “Sifuna abantu basondelele iqembu lethu. Balithande, balilandele ngokulithemba ukuthi liyaphumelela.”
Online Reporter