Online Reporter
Nkosilathi Sibanda
KADE abantu bathi eNkayi kukomnyama ubambile kodwa esinye isakhamuzi sakulindawo uBigboy “Mjimba” Moyo uyakwala lokhu, nanko usezimisele ukuthi aphakamise ithalenta lenguqu elisakhulayo kulindawo.
UMoyo, odume ngokuba ngumncedisi womphakathi lokuba ngusomabhizimusi kwezokwakha, ukulima lokunye, ungomunye wabaqoqi bomqhudelwano womdlalo wenguqu, obizwa ngokuthi yiNkayi Youth Football Tournament, ozaqala kusukela mhlaka 19 kusiya fika umhlaka 21 Mpalakazi, ozaqhutshelwa esikolo seNkayi High.
Kubikwa kuzancintisa amaqembu abafana lamankazana.
UMjimba, kumbiko wakhe ngoMvulo uthe: “Kuza kubancane inkundla eNkayi High School.
“Lo ngumqhudelwano wethu wesibili esizawuqhuba ngempelaviki ezayo. Amalungiselelo aqhuba kakuhle njengoba siqala iviki le, sikhangelele amalanga azayo,” kutsho uMoyo.
“Kuhlandla labafana kuzadlala i-Ama53 Select, Nkayi Soccer Academy, Highlanders, Somvubu Academy, Lupane City FC, Corinthias SOE leSuper Eagles. Asikhohlwanga lamantombazana ngoba sinxuse iSibanye, Nkayi Soccer Academy, Amazwangendaba Royal Queens, Lupane City, Somvunbu Academy leCorinthias SOE.”
UMoyo utshele iphephandaba likazulu ngoMvulo ukuthi inhloso ephambili ngalumncintiswano yikukhulisa abantwana abalethalenta kwezemidlalo, ukwenzela ukuthi babengumzekeliso kwabanye.
“Lapha sithi phakama Nkayi njengesigaba. Siphakamisa intsha yakulindawo ukuthi izimele, itshengisa ukuba eNkayi kulethalenta kunguqu. Lokhu kuzakuba ngumzekeliso ophezulu kwabanye ontanga.
“Kuyaziwa ukuthi ithalenta emaphandleni kwezemidlalo kalibonwa. Thina sizimisele ukuthi sinike abantwabethu ithuba lokubonisa ithalenta labo kuNkayi Football Tournament.”
Umdlalo wenguqu esigabeni seNkayi usukhule wafika kusigaba sokuthi sebebanengi asebelandela amaqembu aphuma kulindawo, agoqela iNkayi United edlala kuZifa Division One. Kule Nkayi Soccer Academy ekhangelelwe ukuthi iyencintisa kunkezo yePirates Cup eMzansi.
