marble nkomo
Ethel Ncube
OMKHULU wamapholisa eMatabeleland South useveze ukuba nyakenye babamba imbanje ezedlula 2 000kg zingeniswa kumngcele weBeitbridge.
UCommissioner Steven Kazingizi ubike ukuba izidakamizwa ziyabulala njalo zenza abantu badale amacala amanengi atshiyeneyo afana lokubulala.
Izidakamizwa okukhulunywa ngazo zigoqela imbanje, injengu labo-mutoriro.
Amacala okusentshenziswa kwezidakamizwa esabelweni seGwanda lokhe ekhwela esiyaphezulu okuyinto edida umphakathi.
Ekhuluma ngalindaba uCommissioner Kazingizi ubike ukuba inani lamacala aphathelane lezidakamizwa likhuphukile kakhulu nyakenye.
“Nxa sikhangele ukusetshenziswa kwezidakamizwa sikhangela iGwanda District leGuyu sizathola ukuba inani lakhona liphezulu kakhulu. EGwanda ngomnyaka ka2024, inani labantu ababotshelwa amacala aphathelane lokuthatha izidakamizwa kwakuyi-24 kuthi ngomnyaka ka2025 laya ku-154, eGuyu ngumuntu oyedwa owabotshelwa icala elikanje ngo2024. Ngo-2025 inani lakhona laqansa laya ku-13.
Njengamapholisa abantu abasebenzisa kumbe abathatha izidakamizwa okudlulisileyo siyababamba asekeli,” kubika uComm Kazingizi.
Uqhubekele phambili ebika ukuba izidakamizwa ezingena ngomngcele weBeitbridge zinengi kakhulu.
“Ngomnyaka ka2025 sibambe abantu bengena lembanje eBeitbridge imbanje lezi zazisedlula 2 000kg.
Imbanje nxa sezifike eZimbabwe ziyathengiswa elizweni lonke jikelele lakuboGwanda khonapha lakho ziyafika zithengiswa. Kungakho sizaqhubeka silwisana lokusetshenziswa kwezidakamizwa ngoba zenza abantu bacine bedala udlakela kumbe bacine bebulalana,” kuphetha uComm Kazingizi.
Online Reporter