admin
YiNtatheli kaMthunywa
UHULUMENDE uzimisele ukunikeza abahlali basemaphandleni impilakahle nanko phela sekusakhiwa amakilinika kuzo zonke iziqinti zeBulilima West.
Iphephandaba likazulu belikhona ngoLwesihlanu ngeviki edluleyo esiqintini seNyele lapho uMmeli we-Bulilima West ePhalamende uKhomuredi uDingumuzi Phuti akhokhele khona izakhamizi kugejwa imfolo yokusukumisa izitina.
Ngelanga elilodwa, kufakwe i-foundation, kwasetshenziswa isamende lezitina ezithengwe nguKmrd Phuti, izakhamizi lalabo abasebenza phetsheya kwesizwe abadabuka eNyele.
Ikilinika yeNyele ibalelwa kwezinengi esezisakhiwa nguHulumende encedisana lezakhamizi esigabeni seBulilima West, kulandelwa uhlelo lwe-National Development Strategy 1.
Amanye amakilinika abalisa iZimnyama, Tjehanga, Makumbi, Nopemano, Luvuluma, Mbimba leMalalume lezinye okumele ziqale ukugejwa kulumnyaka.
UKmrd Phuti uthe ukwakhiwa kwamakilinika la kugcwalisisa izithembiso zikaHulumende okhokhelwa nguMongameli wesizwe uEmmerson Mnangagwa.
“Lesi yisitshengiselo sokuthi uHulumende kaMongameli uEmmerson Mnangagwa uzimisele ukugcwalisa izithembiso ezaphawula ngesikhathi samavoti, ukunikeza abantu bakithi amakilinika kutshengisa ukuthi uHulumende ufuna abantu babe lempilakahle, bathole usizo lapho abahlala khona.
“Ikilinika yakoNyele izanceda kakhulu ekuthini sithole usizo lapha emaphandleni.”
UKmrd Phuti uthe ngokuya kwesikhathi, encedisana lezakhamizi lalabo abasebenza phetsheya, kuzakhiwa isibhedlela esikhulu.
“Njengebandla elibusayo, iZanu-PF izaqhubeka isakha amakilinika lokwakha isibhedlela ukwenzela ukuthi abantu bengahambi imango emide. Le yinhloso yethu ephawulwe ku-Vision 2030.
“Sizasebenza nzima labanye bethu abaphetsheya kwelizwe labahlali bakulindawo yeBulilima West. Kuyavela kithi sonke ukuthi uHulumende wethu uyalalela izikhalazo zabantu.”
-@mthabisi_mthire
Online Reporter