admin
UTholakele wathi esethole ijaha elalifuna ukutshada laye, kwaba lokukhulumela emazinyweni abomdeni kajaha besola ukuthi kambe umntanabo angahohobisa isalukazi, loba nje wayesedlulwa lijaha lakhe ngeminyaka embili inkinga kwakuyikuthi wayesezele abantwana abathathu belaboyise abatshiyeneyo.
Kodwa kuMpiyezwe, ijaha lakhe wayethi uthande uTholakele labantwabakhe njalo abantwana sebengabakhe njengoba unina wabo esengumkakhe.
Into eyayicaphula unina yikuthi agqulele inkelo abazukulu azi mhlophe ukuthi akusibo bakhe. Lababekhuluma benyenyeza ezibholaneni lezivandeni wawubezwa besithi waze wasihudula isalukazi, abanye baze bakhulume angani sebethukana uzwe bethi uthethe iwotshi lemidlwane yayo.
Bona bobabili babethandana okwamagama, bengakutshayi indiva konke okwakukhulunywa ngabantu. Isintu sithi umlomo uyaloya njalo ilizwi lomzali alitshayi phansi, wezwakala unina ethi omunye walababantwana angafa uzangcwatshelwa ngaphi ngoba bona bengazi ukuthi inkanda zakhona zetheswa ngani lokuthi umfokothi wakhona walahlelwa kuluphi ulwandle kumbe kuwuphi umhome.
Lakanye ngokuhamba kwesikhathi laphangalala izibulo likaTholakele loyise wakhona kazange athande ukuziveza mhlawumbe esesaba ukwetheswa ijogwe elinzima lokukhokhela indleko zomngcwabo.
Batshiye ngakini nxa lawe uzele, ungayi labo emendweni, kudala inkulumo ezinengi.
Ayixabene.
Umlobi ungamthinta ku: 0714355641
Online Reporter