admin
Thokozile Mbedzi
KULENDODA yesigabeni seMarula eFigtree efe kuyonale iviki kulandela ukugongodwa ngogodo.
UMarvelous Ncube oleminyaka engu-42 yokuzalwa ubesotha umlilo loChristian Ndiweni andubana baxabane, uChristian wasedobha ugodo efuna ukutshaya uMarvelous, kodwa wamehlula wamhluthunela wamtshaya ngalo wahle waquleka.
Esinye isakhamuzi esikhulume loMthunywa uMnumzana Sibangani Mhlophe uthe bebengacabangeli ukuthi ingxabano phakathi kwalaba ababili ibingaba lesidumbu phansi.
“Lokhe simangele njengezakhamizi zalapha ngoba indlela okwenzakale ngayo iyamangalisa ukuba kucine sokulesidumbu. Amadoda lawa abesotha umlilo kwaba lokungazwanani yikho lapho uChristian asukuma wadobha ugodo olwalukhonapho eduze okwakumele lubaswe wathi ezama ukutshaya ngalo uMarvelous kwehlula.
“UMarvelous waluhluthuna wamgongoda ngalo ekhanda wahle waquleka mhlaka 5 wagijinyiselwa esibhedlela seMarula lapho abafika bamdlulisela ePlumtree lakho wadluliselwa koBulawayo, eUnited Bulawayo Hospitals lapho afika wabhubha ngoMgqibelo,” kuchasisa uMnu Mhlophe.
Uqhubekele phambili esithi ababili laba baphathane okwenyoka ethi ibonakala abantu bahle bagijime befuna ukuyibulala.
Isikhulumi samapholisa esabelweni seMatabeleland South uLoveness Mangena ebuzwa ngodaba lolu uthe basaluchwayisisa.
“Sithanda ukuxwayisa uzulu ukuthi angasebenzisi udlakela ukuze axazulule ingxabano kabikele amapholisa loba abaphathi bezigaba,” kulandisa uInsp Mangena.
Online Reporter