Online Reporter
Nkosilathi Sibanda
UGATSHA lwezempilakahle lokondliwa kuhle kwabantwana kuHulumende luqhuba umkhankaso wokuvikela ukumemetheka komkhuhlane woqhuqho (i-malaria) emaphandleni esigabeni seGwanda, eMatabeleland South.
Kubikwa ngenyanga kaMabasa kufe abantu abayisitshiya galombili, kukanti kutholakale abangu-3 304 belomkhuhlane woqhuqho, okube linani eliveza ukuba uzulu kumele aqaphele, njalo abantu balimukiswe ngokumele bakwenze ukuze baphephe.
Kumaviki adluleyo, ugatsha lolu lunike izakhamizi zeGwanda South amambule okuvimba imiyane (ama-mosquito net).
Omunye wezisebenzi kugatsha lwezempilakahle lokondliwa kuhle kwabantwana eGwanda, uNkosazana Ruwadzano Whande uthe bahlose ukuthi bakhankase ngokwenqabela umkhuhlane woqhuqho lokufundisa abantu ngalumkhuhlane.
“Sithethe inyathelo lokuthi siphe izakhamizi ama-mosquito nets eziqintini ezilitshumi lasikhombisa. Lokhu sikwenzele ukwenqabela masinyane ukumemetheka komkhuhlane emphakathini. Sinikeze ulwazi lezixwayiso ngalumkhuhlane, sihlose ukufinyelela indawo zonke.
“Kuhlelo lwama-mosquito nets, sitshiye ekamelweni linye ngalinye elilala abantu kumizi yonke esiqintini. Sikhuthaza abantu ukuthi balengise umambule wabo ngaphansi komthunzi okwamahola angu-12, phambi kokuthi bawasebenzise. Lokhu kwenqabela ingozi engadalwa ngumuthi ofakwe kumambule lo. Abantu baxwayiswa ukuthi bengawalengisi elangeni,” kutsho uNkszn Whande.
Uzulu uthe bazaqhubeka befundisa abantu ngendlela ezifaneleyo zokusebenzisa umambule okuvimba iminyane.
