Online Reporter
Mthabisi Tshuma
KUZA kwethulwa amakilinika amathathu lapho okuzakwelatshwa khona obabhemi eGwanda, esabelweni seMatabeleland South.
Amakilinika la asungulwa zinhlanganiso ze-AWARE Trust leyeSociety for the Protection of Animals Abroad (SPANA), ezigxile kunhlalakahle yezifuyo, emaphandleni.
Amakilinika la azabe eseziqintini zeTakalinywa mhlaka 5 Ncwabakazi, eManama (6 Ncwabakazi) lase Nhwali (7 Ncwabakazi).
Kuncwadi elotshelwe ummeli weGwanda South ePhalamende, uDokotela Omphile Marupi umqondisi we-AWARE SPANA Zimbabwe uDkt Dutlow, uthe amakilinika la ayingxenye yenhlelo zabo zokwelapha izifuyo mahala, kukhangelwe kakhulu obabhemi.
“Ngimele i-AWARE SPANA Zimbabwe ngithanda ukubonga ukuzimisela kwakho ekunakekeleni obabhemi endaweni yenu. Umsebenzi wakho njengommeli walindawo ePhalamende lokuba ngumsekeli kaMphathintambo wogatsha lwe-Information, Publicity and Broadcasting Services, uyasikhuthaza njalo kuhambelana lenhloso yethu yokugcina izifuyo ngendlela efaneleyo.
“I-AWARE SPANA Zimbabwe ikhangelele ukusebenza lehofisi yakho ibambene lezinye ingatsha ekwethuleni amakilinika la,” kutsho umbiko osencwadini le.
UDkt Marupi uthe obambemi kumele bagcinwe ngendlela efanayo lezinye izifuyo.
“Ngakhula ngisebenzisa obabhemi ukulima lokwenza eminye imisebenzi yekhaya. Kumele sizigcine kuhle izifuyo lezi, njengalokho esikwenza imbuzi, inkomo lokunye.”
Amakilinika la aze ngesikhathi umphakathi weGwanda ufundiswa ngokuqakatheka kukugcina obabhemi.
NgoNkwenkwezi, indawo le yaphatha umkhosi wokuthakazelela iWorld Donkey Day, esiqintini seManama, kuWard 17.
