Online Reporter
Nkosilathi Sibanda
IZIKHAMIZI zesiqintini seLupanda kuWard 22, eLupane esabelweni seMatabeleland North seziphila impilo engcono kulandela ukugejwa kwesibholane samanzi esisebenzisa amandla elanga.
Besekuyisikhathi eside abantu behamba imango emide ukuyadinga amanzi, kodwa kuphelile ukudubeka kulandela ukwethulwa kwesibholane lesi ngoLwesihlanu ngeviki edluleyo.
Isibholane lesi sizasetshenziswa yimizi eyedlula amakhulu amabili (200). Sigejwe, sayethulwa emphakathini kulandela umkhankaso owakhokhelwa yinhlanganiso yeLupanda Thuthukani Women’s Association, isekelwa yiMpilo Foundation.
Omunye wenkokheli zeLupanda Thuthukani Women’s Association uMnumzana Mfundo Sibanda uchaze ukuba isibholane lesi sizaphathisa ekusunguleni izivande zomphakathi, imuli zithole usizo kwezokulima.
“NgoLwesihlanu ngeviki edluleyo, kube lusuku olubeyisiqalo sokuguquka kwempilo zezakhamizi zeLupanda. Sethule isibholane esidonsa amanzi ngamandla elanga, i-solar. Lokhu kuze ngenxa yokusebenza gadalala okwenziwe yinhlanganiso yabesifazane iLupanda Thuthukani Women’s Association, engaba ngomunye wamalunga ayisungulayo. Kube yimpumelelo njalo ngoba sithole usekelo oluvele kunhlanganiso yeMpilo Foundation. Siyabonga kakhulu ngokuseseka kwabo,” kutsho uMnu Sibanda, oyisizalwane seLupanda.
Uthe isibholane sizakwehlisa umthwalo kuzakhamizi ezinengi.
“Isibholane lesi sizakuba ngumthombo wamanzi ahlanzekileyo, othenjiweyo eLupanda kuWard 22. Sizanciphisa ubunzima bansuku zonke kwabesifazane labantwabethu nxa bedinga amanzi. Abesifazane labantwana abangamankazana bazathola ukuphakanyiswa, endaweni yokuthi babelomthwalo lomcabango wokudinga lokuthwala amanzi nsukuzonke. Khathesi sebethola isikhathi sokuhlela ikusasa labo.
“Phezulu kwalokhu, ukutholakala kwamanzi eduzane lemizi kuzavula izivande, kubelotshintsho ngendlela abantu abadla ngayo nanko bazenelisa ukulima bethelezela,” nguMnu Sibanda lo.
Uthe iLupanda Thuthukani Women’s Association ibonga inhlanganiso yeMpilo Foundation ngokukholelwa kumbono lezifiso zezakhamizi
“Isibongo sethu kuMpilo Foundation kasipheli. Izakhamizi zibona ikusasa elihle ngokuphathiswa ngesibholane. Sibonga futhi ngokuphezulu ukuzimisela kwamalunga wonke eLupanda Thuthukani Women’s Association. Sibonge umsebenzi womqoqi wenhlelo kunhlanganiso uCurzon Sibanda. Ukusebenza kwakhe kanzima sekube lempumela enhle. Ngokwami ngiyabonga ukusebenza lequla elizimisele kanje ekuthuthukiseni indawo yakithi. Sindawonye singenza okunengi.”
