Online Reporter
Nkosilathi Sibanda
UMDWEBI wakoBulawayo, uSipho Khumalo ngoLwesihlanu uzakwethula umbukiso wemidwebo ebabaza impilo lemisebenzi yeNkosi uMzilikazi.
Umbukiso lo uzabe useNatural History Museum koBulawayo ngehola lesibili emini, njalo uzaqhutshwa ngaphansi kwendikimba ethi: “INkosi uMzilikazi: Sithakazelela ilifa lakhe lokwakha isizwe”.
Lo kuzabe kungumbukiso wakuqala wemidwebo, okhangelele ukuthi usungule inkulumo emphakathini mayelana ngokusebenzisa indlela ezinengi zokugcina lokwethula imisebenzi yeNkosi uMzilikazi, amasiko lemikhuba yamaNdebele.
UKhumalo uthe imidwebo yakhe itshengisa ukuthi iNkosi uMzilikazi, eyasungula isizwe samaNdebele ihlonitshwe kanjani njengomkhokheli umhlaba wonke. Uthe iNkosi yamaNdebele yayihlonipha impilo, iqakathekisa ubuntu, imvelo lokukhankasela ukuzimela.
“Umbukiso lo uhlose ukuthwebula indaba yeNkosi uMzilikazi, igcizelela indima yayo njengomakhi wesizwe kunye lophawu lwamandla ayelawo, ukuqina, lokuzigqaja kwesizwe samaNdebele. Ngumbukiso wemidwebo yokuhlonipha iSilo esikhulu. Ngobuciko, sethula ukuthi iNkosi yethu yakwazi kanjani ukwakha isizwe phakathi kwezizwe ezehlukeneyo.
“Kumbukiso lo kuzabe kulemifanekiso eveza indlela yokuphila yamaNdebele. Silemifanekiso yenkomo eyisitshengiselo somnotho wamaNdebele. Sihlolisisa impilo yesikhosini, ukuqakatheka kwamakhosikazi njengomama besizwe, ukuqakatheka kwezinduna ekulondolozeni amasiko kunye lokulondoloza ukuthula emphakathini. Sinxusa wonke umuntu ukuthi abe yingxenye yalumbukiso,” kutsho uKhumalo.
Ekuhlanganiseni umbukiso lo, uKhumalo ubesebenzisana loFisani Nkomo. Isikhulumi esimqoka kuzabe kuyiNkosana uLeo Zulukandaba Khumalo.
