Online Reporter
Nkosilathi Sibanda
UKUBA ngumdlali wenguqu kungumsebenzi omkhulu, olandelwa ngabantu abanengi. Umdlali wenguqu olesiphiwo usuka abeyintandokazi, abengusaziwayo olodumo ngoba abantu besamukela ukuthi uyabajabulisa emdlalweni.
LoBrian Banda, obedlalela iFC Platinum uphile impilo enjalo. Umdlali lo wedlule emhlabeni ngeSonto kungozi yemota, emgwaqweni osuka eZvishavane uqonde koBulawayo. Ubeleminyaka yokuzalwa engu-29.
Ungcwatshwa ngoLwesine eLady Stanley. Abantu bazaqala ukubuthana eBulawayo Amphitheatre lapho okuzaqhutshwa khona inkonzo yokumvalelisa. Kukhangelelwe ukuthi kube lezikhulumi ezinengi ezivela kumdlalo wenguqu kuleli.
Wake wadlalela iHighlanders, iqembu elamnikeza udumo andubana ayekuFC Platinum. Watshibilikela lamaWarriors.
I-FC Platinum ithe ilahlekelwe ngumdlali obethandwa ngabanye abadlali.
“Okudabukisayo yikuthi ulahlekelwe yimpilo yakhe lapho okwenzakale khona ingozi, ikanti iFC Platinum ilahlekelwe ngumdlali omkhulu. Sicela wonke umuntu ahloniphe imuli yakhe ngesikhathi esinzima.
“Lala ngokuthula Brian Banda, iFC Platinum ayilahlekelwanga kuphela ngumdlali olesiphiwo kodwa ilahlekelwe ngumdlalo obengumngane wabanye abadlali.
“Ubezinikele emdlalweni, elomdlandla phakathi langaphandle kwenkundla.Kulezi izikhathi ezinzima, masikhumbule injabulo lothando uBrian ayilethe empilweni zethu. Sidlulisa amazwi enduduzo emulini, abangane, labo bonke abebemthanda kakhulu. Sekungathi ifa lakhe lingahlala ezinhliziyweni zalabo abathintileyo.”
Inhlanganiso yePremier Soccer League (PSL) ikhuphe umbiko, iduduza imuli yakoBanda ngesehlakalo.
“IPremier Soccer League idabuke kakhulu ukuzwa ngokudlula emhlabeni kukaBrian Banda oweFC Platinum. Ubengumdlali obelethalenta, uthando lokuzinikela emdlalweni.
“UBrian utshiye umthelela omuhle enkundleni yemdlalo, enhliziyweni zabalandeli, iqembu lakhe kunye lomphakathi webhola. Sidlulisa amazwi enduduzo emulini yakhe, abangane, imuli yeFC Platinum labo bonke emdlalweni webhola ngalesi isikhathi esinzima.”
Umuyi wake wadlalela iHighlanders, iqembu elamnikeza udumo. IHighlanders ithe: “IHighlanders Football Club idane kakhulu ngokudlula emhlabeni kukaBrian Banda, umdlali wasesiswini weFC Platinum njalo owake waba ngumdlali weHighlanders.
“UBrian ubengumdlali wasesiswini olesiphiwo njalo ezigqaja ngokugqoka ijesi lethu elimnyama lokumhlophe, ngaphambi kokuba ayekuFC Platinum. Sidlulisa amazwi enduduzo kumuli yakhe, abangane, abadlali, ngalesi sikhathi sokulahlekelwa okukhulu. Sengathi umphefumulo wakhe ungalala ngokuthula.”
