adminYiNtatheli kaMthunywa
AMAQEMBU ayisitshiya galombili kaDivision One kumhlubulo ongezansi yelizwe aqale phansi kubangwa inkezo kaJoshua Mqabuko Nkomo Trukumb Top 8 kulimpelaviki.
Inkezo le iza ngesikhathi isizini kaDivision One isiphelile njalo idibanisa amaqembu aphetha umnyaka ephezulu.
Amathimu azangqikilana abalisa intshantshu iBantu Rovers, iBulawayo Chiefs, Amagagasi, ZPC Hwange, ZRP Bulawayo, Talen Vision, Black Boots leNdlovu Iyanyathela.
Abaqoqi balinkezo, inkampani ebizwa ngokuthi yiTrukumb, babike ukuba baphosele imali engange $10 000 ezasetshenziswa ukuqhuba indleko zemidlalo lemivuzo.
UMthunywa utshelwe ukuba abanqobi benkezo bazathola i$2 400. Ithimu ezadliwa ku-final ithola i$1 500.
Kumaqembu azaphelela kuhlandla lama-semi-final, kuzakuba lomvuzo we$700. Amathimu amane azasalela muva azabuyela ekhaya ebambe i$300 inye ngayinye.
Kumidlalo yelinkezo kuzwakale ukuthi kunxuswe abacuphi labaqeqetshi besizwe seAustria abalande ukudinga abadlali abatshisayo enkundleni zikaDivision One.
Isikhulumi sabasekeli benkezo uSabelo Mpofu ubike ukuba inkezo le ihlose ukuqinisa ukubambana kwabantu ngokusebenzisa umdlalo wenguqu.
“Inkezo le izadlalelwa ngamathimu la aqeda isizini ka2016 engaphezulu kwenombolo yesitshiya galombili. Sihlose ukukhankasela ukubambana njengalokho okwakufunwa nguMdala Wethu uJoshua Nkomo.”
Inkampani yeTrukumb ithe izaqhubeka isekela inkezo le minyaka yonke.
Online Reporter