marble nkomo
Innocent Kurira
YIMPI yabomakhelwane ngeSonto kudibana iHighlanders leBulawayo Chiefs enkundleni yeBarbourfields, kuvulwa isizini entsha yeligi yeCastle Lager.
Abaqeqetshi bamaqembu womabili bakhuluma ngokuzethemba ukuthi balolonge abadlali babo ekuthini badlalele ukunqoba.
UJohn Nyikadzino, okhokhele ukuthi iChiefs ibuyele kuligi ephakemeyo, usehambe ibanga elide kwezemidlalo yenguqu njalo uyazi ukuthi ukujabulela impumelelo ngokweqileyo kungaletha ingozi.
Lanxa abanengi besajabulela ukuphakama kweqembu, umqeqetshi lo ololwazi lokuthi ukudibana leqembu elingangeHighlanders kudinga ukuthobeka, ukuzimisela lokusebenza gadalala. Kuye, ukubuyela kuzigaba eziphezulu akusikho ukuphela kohambo kodwa kuyisiqalo somzabalazo omkhulu ozahlola isibindi, ukujula kweqembu lokuzinza kwalo.
Ngesikhathi idolobho lakoBulawayo lilungiselela umdlalo omkhulu wabomakhelwane, uNyikadzino ulomlayezo owodwa, owokusebenza nzima.
“Umdlalo wokuqala uqakatheke njengomdlalo wokucina wesizini. Yonke imidlalo yethu yeligi siyiphatha ngendlela efanayo,” kutsho uNyikadzino.
Kumqeqetshi owavuselela iChiefs, wabuyisela isithunzi sayo kuPremier Soccer League (PSL), okuqakathekileyo kuye yikuba lombono obanzi, kulokuthatheka kusuku lokuvula isizini.
IChiefs ibuyela kusigaba seligi ephakemeyo izimisele hatshi nje ukusinda kuphela, kodwa ukuncintisana ngamandla, njalo ukudlala lomakhelwane, iHighlanders, lokhu kuzakuba yisilinganiso sokukhangelisisa ukuqina kwayo.
UNyikadzino ukholwa ukuthi abadlali bakhe bayabuzwisisa ubukhulu bomsebenzi abawuphetheyo.
“Bonke abadlali bayazi okulindeleke kithi kunye lomsebenzi obawukhangeleyo. Ngiyasuthiseka kakhulu, silindele umdlalo wangeSonto leHighlanders,” kutsho uNyikadzino.
“Angifuni ukukhuluma ngomqeqetshi weHighlanders. Ngikhetha ukukhuluma ngeqembu lethu, iBulawayo Chiefs. Engingakutsho kuphela yikuthi ngihlonipha wonke umqeqetshi, kuloba yiliphi izinga lebhola.”
IChiefs ingena lumdlalo ithenge abadlali abangu-12 abatsha, okuveza inhloso kaNyikadzino yokugcina iqembu likuPremiership.
Imidlalo yakuqala kuligi yeCastle Lager Premiership:
NgoLwesihlanu: FC Hunters v Mwos (Rufaro Stadium)
NgoMgqibelo: Herentals v Chicken Inn (Rufaro Stadium), Ngezi Platinum v FC Platinum (Boobab)
Triangle v ZPC Kariba (Gibbo), Telone v Dynamos (Ascot Stadium).
NgeSonto: Caps United v Agama (Rufaro Stadium), Manica Diamonds v Simba Bhora (Gibbo Stadium),
Hardrock v Scotlland (Chawanda Stadium), Highlanders v Bulawayo Chiefs (Barbourfields Stadium)
Online Reporter