Online Reporter
Lovemore Kadzura
SELIVUME ukuthi lilecala inina eliphume kwenye ividiyo litshaya umntanalo, limbophe izandla lenyawo.
Lizagwetshwa ngoLwesithathu.
Isehlakalo lesi, esesigcwele enkundleni zokuxhumana, senzakale kuVillage 28, Mount Zonzwe, eMarange esabelweni seManicaland ngenyanga kaNtulikazi.
Inina leli, u-Idah Mushayi oleminyaka yokuzalwa engu-27, njalo umntanakhe lo akade emtshaya uleminyaka yokuzalwa engu-11. UMushayi umiswe phambi kukaMantshi u-Annie Ndiraya ngecala lokuhlukumeza lokwehluleka ukunakekela umntwana (Section 7 (1) of the Child Protection Act, Chapter 05.06.).
Kazange achithe isikhathi ngoba uhle walivuma icala. Ufike emthethwandaba ebhabhule usane.
Umtshutshisi uThurston Mubvumbi uthe ugatsha lweSocial Welfare lusahlolisisa isimo somntwana.
Inkundla izwe ukuba esenza icala, uMushayi wayezondele ukuthi umntanakhe lo wayala ukugezisa imiganu. Wamtshaya ngomchilo embophe izandla lenyawo.
“NgoNtulikazi 2025, umsolwa watshela umamangala ukuthi agezise imiganu, wayala. Lokhu kwazondisa umsolwa, owaqala ukumtshingela. Umamangala wazama ukubalekela umsolwa kodwa wambamba, wambopha izandla lenyawo, esebenzisa izigqoko ezidabukileyo. Wamtshaya ngomchilo kanengi nengi umzimba wonke.
“Udaba luvele sobala sekusabalale ividiyo enkundleni zokuxhumana, okwadala ukuthi kubotshwe umsolwa. Umamangala wavuvuka emhlane, enyaweni lasebusweni,” nguMubvumbi lo etshela inkundla.
