Online Reporter
KWAKUTHI nxa kufika izikhathi zenyanga kaMpandula lapho okuyabe kukhangelelwe khona ukuthi yisikhathi sokusewula kwezulu wonke umuntu uyabe ejabulile.
Wawusizwa abanye sebeze besenga lezimithiyo bethi bazwe kuthiwa lonyaka linengi izulu, kuzakuba yinala abanye njalo ngabahlezi bengomakholwa ngokubona njengoThomasi wasebhayibhilini incwadi engcwele ekaMvelinqangi uzwebethi sizakholwa ngokubona.
Izulu linile phose indawana zonke zelizwe, abantu balima okuzwayo sibi sabasemadolobheni balimile emikhunjini ezifula ezithwala ingcekeza lasemaceleni kwemigwaqo, sithemba loba kungavunyelwa umanisipala uzabazwela angageci izilimo zabo zizezivuthwe ngoba phela abantu bayayesaba indlala.
Esiqintini sakithi linile lakho okuzwayo njalo lokhe lisina kodwa abanengi ngeke izilimo zabo zisavuthwa kuhle ngoba sebekhala ngokuthi kuyatota njalo akusahlakuleki nanku libayimvimbi phose okwamaviki amabili lemifula isihlala ithwele izigodo ngokugcwala, abantwana besikolo abachapha lapho okungela mabholoho bavele bengayi esikolo, kube lesehlakalo esibuhlungu lapho umfula uthe uthelile wakhukhula abanye otsheketsha akade besemba igolide abahlanu labanye lokhe besadingwa, akwaziwa ukuthi kumbe amanzi abaphosele elwandle kumbe badliwe yizinanakazana ezihlala emanzini.
Abanye ngakade bethathwa ngamanzi besiya kumbe bevela eGoli kuchatshwa kusetshenziswa isikepe, abalomnyama bekuthi singagudlwa yizigodo sibhewuke babuthwe ngamanzi lemitshaqana yabo, abalenhlanhla izihlobo zabo zibabone sebeyizidumbu bayangcwatshwa.
Kwelinye ilanga kuthe kugcwele umfula omkhulu wavalela ngaphetsheya amankomokazi akade elamathole athe esekhumbula ematholeni awuwela umfula ungaphefumuli athathwa wonke lakhathesi umnikazi ukhala ezimathonsi ngoba sokumele athengele amathole uchago lwesikhiwa funa indlala ikuphephuluze.
Isixwayiso sami ngesokuthi abantu bangangeni emanzini nxa umfula ugcwele ngoba labantu nxa sebejahe ukuya ngakibo batshovela labatshayeli bezimota lamabhasi ukuthi baqunge izibindi bangene emanzini ibholoho lingakhanyi alikhuthe umtshayeli babuthwe abantu. Ayixabene!
