Online Reporter
Ethel Ncube
ABALIMI kundawana zonke zelizwe bakhuthazwa ukuba balime i-marigold ngoba iyancedisa ekulwiseni izibungwana ezihlasela izilimo kukanti njalo iyancedisa kusimo somhlabathi.
Ingcitshi kwezeHorticulture kunhlanganiso ye-Agricultural, Technical and Extension Services uNkosazana Treggy Mpofu ukhuthaze abalimi ukuthi balime iluba elibizwa ngokuthi yi-marigold ngoba lilusizo kakhulu kubalimi ngoba liyaxotsha izinanakazana eziluhlupho kuzilimo.
“I-marigold liluba elilusizo kakhulu kuzilimo ikakhulu ezivandeni ngoba lenza izibungwana ezingaphazamissa isivuno somlimi zikhangeke ziye kulo zingasayi kusilimo.
“Lokhu kwenza izilimo zingasadliwa loba ukulunywa yizinanakazana,” kutsho uNkszn Mpofu.
“Umlimi ulakho ukuthatha izinanakazana lezi zisakuluba leli le-marigold azibulale loba ayezichithela khatshana lapho angazitshisa khona loba ukuzifaka umuthi zingakahlaseli izilimo umlimi acine elahlekelwa yinzuzo yakhe.
“I-marigold ingahlanyelwa kulandelwa imifolo kuseqiwa ukuze izilimo zivikeleke kuzibungwana.
“Amaluba eMarigold ahlala isikhathi eside okwenza ukuba umlimi athole ukulondolozelwa izilimo zakhe.
“I-marigold iphathisa kakhulu lasekuhlanganiseni impoko ukuze zithele amaluba ngoba iyahuga inyoni, inyosi lezinye ezitshiyeneyo eziyabe zilande amaluba la.
“Amaluba lawa enza kuphaphe imihlobo etshiyeneyo yenyoni, inyosi zihlanganisa impoko.
“Kungakho i-marigold iqakathekile ngoba ihuga izinanakazana ukuthi ziqede ithuba zikuluba leli, izilimo zingabe sahlaselwa,” kuphetha uNkszn Mpofu.
