admin
Ethel Ncube
INHLANGANISO yeZimbabwe Farmers Union ikhuthaza abalimi ukuthi lapho izulu elina khona balime izilimo eziphangisa ukuvuthwa njengoba umumo womkhathi suguqukile njalo lezulu lingasani ngendlela efananayo indawo yonke.
UMkhokheli weZimbabwe Farmer’s Union uMnumzana Abdul Nyathi uveze ukuthi omunye lomunye umlimi kakhangelisise ukuthi endaweni yakhe izulu linengi okunganani.
“Sikhuthaza abalimi ukuthi balime amabele lenyawuthi ngoba kuvuthwa masinyane njalo akulandaba lamanzi amanengi,” kutsho uMnu Nyathi.
Uqhubekele phambili echaza ukuthi abanye abalimi bangalima ezinye izilimo ukuze kube lokudla okutshiyeneyo.
“Asitsho ukuthi bonke abalimi balime inyawuthi kumbe amabele, lokhu sikukhuthaza lapho eliyake line khona ukuthi nxa kuvuma kulinywe lezozilimo ngoba abantu belakho ukuthola ukudla,” kulandisa uMnu Nyathi.
“Abafuna ukulima umumbu bangalima umhlobo wenkawu lomvundla ngoba iphangisa ukuvuthwa. Inhlanyelo le ithatha inyanga ezimbili kuphela ukuvuthwa kodwa uhlupho lungaba khona nxa izulu lingaphangisa ukuhamba ngoba ilakho ukutsha,” kubika uMnu Nyathi
Ekhuluma lentatheli uMnumzana Nyathi uchaze ukuthi abalimi kabahlanyele lezinye izilimo ezivuthwa masinya.
“Abalimi balakho njalo ukuhlanyela intanga zamakhomane, amajodo lamakhabe, lokhu akuphuzi ukuvuthwa ukuze abantu basizakale bengasweli ukudla.
“Siyacebisa abalimi ukuthi omunye lomunye kakhangele lapho akhona ukuthi lina njani alime okuvumayo.
Kungabi yindlala indawo yonke, abanye badobhe okulutshwana abakuhlanyeleyo,” kuphetha uMnu Nyathi.
Online Reporter