Online Reporter
Ethel Ncube
INHLANGANISO ebona ngezokulima eye-Agritex isixwayise abalimi ukuba isikhathi sokuthi bakhiphe umumbu engalaneni besiyahulula asikafiki ngoba ungakomisisi.
Abalimi kumele baqale ukuhulula umumbu ngenyanga kaMpandula.
Umlimisi we-Agritex uNkosazana Silethemba Sibanda uthe umumbu omnengi kawukafiki kusigaba esiyiso sokoma ngoba uyabe ungathi useselobumanzi.
“Abalimi kabalinde uNcwabakazi aphele ukuze baqalise ukuhulula umumbu. Wekeleni uqale utshaywe ngumoya ubuye uhlatshwe lilanga ukuze lenqabele ukuba ubole nxa lingawuhulula ungakomisisi.
“Lindani inyanga kaNcwabakazi iphele libe selikhupha umumbu engalaneni selihulula.
“Umumbu ngesikhathi somqando ubuvuka kwesinye isikhathi umanzi kungakho khathesi ilanga seliqalile ukutshisa, kuyadingeka ukuba siwekele wome usengalaneni singajahi ukuwuhulula isikhathi singakafiki ngoba kungacina kusehlisa isivuno sakho usuhulule umanzi wabola.
“Kungakho-ke asimeni umumbu wethu wome kuhle sibe sesiwuhulula,” kutsho uNkszn Sibanda.
Ubuye waveza ukuba nxa ungelaqiniso lokuba umumbu wakho suwomile kulendlela ongayisebenzisa ukuhlola lokhu.
“Nxa kungenzeka ukuba ungabi leqiniso lokuthi umumbu wakho usuwomile, thatha igabha ledobi uligezise lome.
“Ungaligezisa suthatha isawudo uhulule lomumbu olingeneyo ufake phakathi kwegabha, uqede uvale ubeke elangeni.
“Umumbu nxa kuyikuthi suwomile isawudo olivalele phakathi lomumbu kumele ulithole lomile, nxa ungathola isawudo limanzi kutsho umumbu wakho awukawomi.
“Yikho nje sikhuthaza abalimi ukuthi balinde nje uNcwabakazi aphele babe sebeqala ukuhulula ngoMpandula,” kuphetha uNkszn Sibanda.
