Online Reporter
YiNtatheli kaMthunywa
IZAKHAMIZI zeGwanda sezixwayiswe ukuthi zingachaphi imifula egcweleyo ukuze kuvikelwe ukufa.
Kusitatimende onguGwanda District Risk Reduction (DRR) focal person, kuCivil Protection, uMnumzana Awakhiwe Moyo, uthe izulu elina esigabeni lesi linengi njalo lokhu sekubangele ukuthi imifula eminengi igcwale.
Kulesakhamuzi esilele ubusuku bonke siphezulu kwesihlahla emfuleni uTuli, eGwanda ngoMvulo.
“Imizamo yokuhlenga iyaqhubeka ngemva kokuba kubikwe ukuthi kulabantu abahlanu abavalelwe ngumfula ogcweleyo. Abantwana abathathu sebencediwe njalo basathola usizo lwezempilakahle. Unina kakatholakali, njalo imizamo yokumdinga iyaqhubeka. Kulomuntu oyedwa olokhu elenga esihlahleni, lapho alele khona ubusuku bonke. Amapholisa azisiwe njalo athumele iqembu endaweni yesehlakalo ukuyahlola,” kutsho yena.
Kulandela izulu eline eGwanda ngoLwesibili ekuseni abatshayeli kunye lezihambi bake baqeda amahola ambalwa bedideke nanko ibholoho leMtshabezi, eliyilo elisetshenziswa ukungena edolobheni leli, beligcwele.
Ibholoho leli yilo okuhanjwa ngalo nxa kuyiwa eBlanket Mine kunye lesigabeni seMaphisa.
“Sixwayisa uzulu ukuthi aqaphele ngoba imifula igcwele ngenxa yezulu eliengi. Lanxa sixwayisa, abanye abantu bazifaka engozini ngokuzama ukuchapha imifula egcweleyo, befaka impilo zabo engozini. Amapholisa eZimbabwe Republic Police asebenza ngamandla ukuqinisekisa ukuthi kulandelwa imithetho yokuzivikela.
“Sixwayisa abantu bonke ukuthi bangazifaki engozini ezingadingakaliyo. Ibholoho leMtshabezi ligcwele amanzi, njalo sekubotshwe abantu abanengi ngokuzama ukuchapha umfula lanxa bexwayiswa. Imbiko ikhomba ukuthi kulabanye omakorokoza abemba igolide okungekho emthethweni abavalelwe ezindaweni ezitshiyeneyo zeGwanda ngenxa yemifula egcweleyo. Sinxusa wonke umuntu ukuthi abeke ukuphepha kanye lempilakahle yakhe phambili,” kutsho uMnu Moyo.
Kusenjalo, uMphathinbtambo obona ngokwenzakala esabelweni seMatabeleland South, u-Albert Nguluvhe, uthe kulendingeko yokuthi kwakhiwe ibholoho elingcono.
“Lamuhla ekuseni, ngivakatshele ibholoho eliwela uMfula uMtshabezi, indawo ebalulekileyo ehlanganisa iBlanket Mine, iMaphisa kunye ledolobho leGwanda. Kubuhlungu ukuthi izimota bezisehluleka ukuchapha. Lokhu kubi ngoba umgwaqo lo, uyalungiswa ukuze kube lomgwaqo oqonda eMaphisa, lapho okuzathakazelelwa umkhosi kaZibuse ngomnyaka ozayo.
