Online Reporter
Ethel Ncube
IZAKHAMIZI zeBinga sezikhuthazwe ukuba zingadlali ngempilo zazo ngokuchapha imfula igcwele njengoba isikhathi sezulu sesifikile.
Lokhu kukhulunywe yinduna uDobola esithi izakhamizi kumele zihlale zikhumbula ukuba kuyingozi ukuchapha imfula igcwele. Ithe nxa zithe zafica umfula ugcwele kazingajahi kodwa zilinde umfula uze wehle besezichapha.
Ekhuluma lentatheli uDobola uveze ukuba abazali kumele baqhube abantwana nxa besiya esikolo ngalesisikhathi.
“Ngithanda ukugcizelela ukuthi kuyingozi bantu bakithi ukuchapha umfula ugcwele.
“Nxa uthe wawufica ugcwele kumele ulinde nxa kusenza ucele indawo yokulala kulokuthi ubeke impilo yakho engozini.
“Kumqoka ukukhumbula lokho ngoba nxa ungajaha uyathathwa ngamanzi abantwana basale bengelababa kumbe umama.
“Abantwana abancane labo sokumele baqhutshwe nxa besiya esikolo nxa kuyikuthi kulomfula okumele uchatshwe.
“Phela okhekhe kwesinye isikhathi kabalakho ukunanzelela lapho okulengozi kungakho-ke ngithanda ukuthi ngicele abazali ukuthi babaqhube nxa besiya esikolo. Kungangcono balove baphephe kulokuthi bachaphe umfula bangabi besafika esikolo sakhona,” kutsho uDobola.
Induna iqhubekele phambili ibika ukuba izabhoda ngezigaba ilimukisa uzulu ngengozi ezibakhona ngesikhathi sezulu ezigoqela indlela abantu abangizivikela ngazo nxa kulombane.
“Ngizabhoda ezigabeni ngilimukisa abantu bonke kunye lezikolo ngendlela zokwenqabela ingozi eziphathelane lesikhathi sezulu.
“Abantwana laba singabazali kumele sibacebise ukuba bengadlaleli ezizibeni kumbe emifuleni ngoba balakho ukuba bathole umfula ulamanzi alingeneyo bacabange ukubhukutsha bacine begalula bathathwe amanzi. “Kuhle ukuba abantu bananzelele nxa izulu lisina ngoba zinengi ingozi ezivelayo,” kuphetha induna.
