Online Reporter
Nobuhle Mgwaqo
UMPHATHINTAMBO wogatsha olubona ngezempilakahle lokondliwa kuhle kwabantwana usegcizelele ukuthi bonke abathatha amaphilisi okucindezela igcikwane le-HIV bangatshaywa luvalo ngoba kulamaphilisi enyanga ezilitshumi ezizayo.
UMphathintambo wogatsha lolu, uDokotela Douglas Mombeshora ukhulume lokhu izolo ngesikhathi kulesikhumbuzo salabo abedlula emhlabeni ngenxa yegcikwane leHIV, i-International Candlelight Memorial, ebisesikolo seMzingwane High School, eSigodini, kusandulelwa usuku lwe-World AIDS Day.
Isikhumbuzo salonyaka senziwe ngaphansi kwendikimba ethi; “Siyakhumbula, Siyavuka, Sikhokhele, (We remember, We rise, We Lead).”
“Ngifisa ukuthi ngiqinisekise ukuba silamaphilisi ama-Antiretroviral enyanga ezilitshumi ezizayo. Akulandingeko yokuthi kube lomuntu obalokukhathazeka ukuba kungenzeka angatholi amaphilisi akhe.
Khululekani,” kutsho uDkt Mombeshora.
Ubuye waveza futhi ukuthi sebeqalisile njalo ukuthenga amanye.
“Ngiletha isiqiniseko sokuthi ugatsha olubona ngezeMpilakahle lusebenzisana leNational AIDS Council sezibambisene ukubona ukuthi konke ebelikuthola kuyaqhubeka. Ngesikhathi kusenziwa isimemezelo sokuthi uhulumende we-US usenqume usizo kwaba lokukhathazeka ngenhlelo ezasisekelwa yimali leyo ezokutholisa amaphilisi ama-Antiretrovial,” kutsho uDkt Mombeshora.
Uthe indima edlalwa ngumphakathi iqakatheke kakhulu ekuqhutshweni komsebenzi wogatsha lolu.
Uthe umkhosi wokulumathisa izibani kukhunjulwa abadlula emhlabeni ngenxa yomkhuhlane lo kayisi sikhumbuzo nje, kodwa lithuba lokuzihlola, sikhangele lapho esivela khona, sokubambana kanye lokuvuselela ukuzimisela kwethu.
“Sibuthene ukukhumbula labo abedlula emhlabeni, ukusekela labo abaphila ngesibindi legcikwane le-HIV, njalo lokuqinisekisa ukuzimisela kwethu ukuqeda i-HIV njengengozi empilweni kazulu eZimbabwe. Umkhosi weSikhumbuzo owenziwa emazweni ehlukeneyo ngomunye wemicimbi emidala njalo eqakathekileyo yokuhlanganisa abantu bomphakathi emhlabeni jikelele. Injongo yawo kuyikusikhumbuza ngokuqakatheka kwempilo.
Ubuye waveza ukuthi ilizwe leZimbabwe selenelise ukugcwalisa imigomo eyabekwa yi-United Nations eye-95-95-95.
Uthe lokhu kuphumelele ngenxa yokubambisana kogatsha lwezempilakahle kanye lomphakathi.
Uthe ilizwe leZimbabwe seliqhelise indawo lapho abaphila legcikwane abangahlolwa isilinganiso segcikwane emzimbeni (viral load), abangathola khona i-Pre Exposure Prophylaxis okuliphilisi lokuvikela ukutheleleka ngegcikwane kanye lezinye inhlelo zezempilakahle.
Uthe ilizwe liqhubekela phambili lisenza imikhankaso yendlela zokuvikela ukumemetheka kwegcikwane le-HIV ngokuhlolwa igazi, ukwengezwa kohlelo lokutholisa amajazi abakhwenyana kanye lezindlela zokuncedisa ukulimukiswa kwabatsha ngokumemetheka komkhuhlane lo kanye labantu abasengozini.
Umkhosi weWorld AIDS Day uzaqhutshwa lamuhla esikolo seMzingwane High School, esabelweni seMatabeleland South.
