Online Reporter
Nkosilathi Sibanda
IQEMBU leMWOS kumele libonge unozinti walo uFrancis Tizayi owenze konke okusemandleni akhe ukuvimba amabhola akade ethululwa yiHighlanders eqonde egedini kumdlalo weCastle Lager Premiership ngoLwesithathu emini, enkundleni yeBarbourfields.
Kusukela ngomzuzu wakuqala iHighlanders itshengisele ukuba lomfutho, abadlali bebonana kalula nxa beliphaselana ibhola. Ukukhalipha kwabafana bakaBenjani Mwaruwari kubonwe ngababukeli, abaphume eBarbourfields bebonga indlela iqembu elidlale ngayo.
Emdlalweni, iHighlanders ithole amathuba okuhlohla edlula ayisitshiya galombili kodwa ngenxa yokuzimisela kukaTizayi kunye lethimba lemvimbi zeMWOS akuzange kuphume lutho.
IMWOS izamile ukwethusela, isebenzisa ukugijima kuhle kwabagadli bayo, ivinjwe yikuthi abadlali laba behluleke ukuzwanana, amabhola abo ephetha ngokuphuma enkundleni.
Ukuhlasela okwenziwe yiHighlanders kugcwaliseke njalo ngama-corner kicks abekhona akade ethathwa ngu-Andrew Mbeba.
Kukho konke, umdlali ohambe phambili kulabanye kuHighlanders nguMongameli Tshuma. Ngomzuzu wesi-47 uphose walithela emambuleni kodwa ibhola lisuke laqansa phezulu kwegedi. Manengi amathuba atholwe ngumfana lo. Abanye abaphume kulumdlalo bethole amathuba okuhlohla kuBosso nguNever Rauzhi loBenjamin Adegoun.
IMWOS ibiqine ingafuni lokuthintwa, loba nje ibithwele nzima ukuvimbela iBosso lapho ihlasela. UMwaruwari, kusigaba sokuqala somdlalo ungenise uBrighton “Maninja” Ncube, okwaziwa kakuhle ukuthi uzwanana loTshuma ngoba bakhula bedlala bonke elokitshini leMinyela koBulawayo.
Umdlalo ufike kubanga lapho wonke amaqembu aphelelwe ngumphako ngesigaba sesibili.
Lomqeqetshi weMWOS Lloyd Mutasa uzame ukungenisa abadlali abatsha kodwa abazange benze umehluko.
Umdlalo uphele kunjalo, kungela ethe khoxo emambuleni.
