Online Reporter
Fungai Muderere
IBHOLA lingaletha udumo, izicoco lentokozo enkulu, kodwa kumdlali wamaWarriors uDaniel Msendami, ukunqoba isicoco seBetway Premiership leqembu le-Orlando Pirates, kwakuhambisana lobuhlungu obukhulu.
Lanxa abadlali ayedlala labo babethokoza ngokunqoba iligi, inhliziyo kaMsendami yayikundodakazi yakhe eyadlula emhlabeni ngoMbimbitho ilenyanga ezimbili izelwe.
Ngamazwi athinte abanengi babalandeli bomdlalo webhola lenyawo, uMsendami wafaka umfanekiso wamntanakhe kuWhatsApp Status yakhe ehambisana lamazwi abuhlungu athi:
“Lokhu ngokwakho mntanami.”
Kumdlali lo othuleyo njalo ozithobileyo, ukunqoba iligi kwakungasiso nje isicoco kuphela kodwa kwakuyisikhumbuzo sobuhlungu besikhathi esinzima adlule kuso phakathi kwesizini.
UMsendami wangena ku-Orlando Pirates ekuqaleni kwesizini evela kuMarumo Gallants elethemba lokuphakamisa umsebenzi wakhe wokudlala ibhola kwelinye lamaqembu amakhulu e-Afrika.
Kodwa, kungakapheli isikhathi eside esefeze iphupho lakhe, wehlelwa yilezi elimnyama, walahlekelwa yindodakazi yakhe.
Lanxa wayethwele ubuhlungu obungaka, waqhubeka elwela indawo yakhe eqenjini lePirates eligcwele abadlali abalethalenta lapho ukuncintisana okwakunzima khona isizini yonke.
Indlela yakhe yokuphumelela ibuye iveze iminyaka yobunzima adlule kuyo engakafinyeleli empumelelweni.
UMsendami wakhulela kumaqembu abancinyane beqembu leHighlanders FC kodwa akazange athole ithuba lokuzimisa eqenjini elikhulu.
Lokho kwamfuqa ukuthi adinge amathuba kwamanye amazwe, indlela eyacina imuse eSouth Africa lapho ithalenta lakhe elakhula khona.
NgeSonto eledluleyo ngesikhathi ethokozela ukuphakamisa esinye sezicoco esikhulu ebholeni laseSouthern Africa, uMsendami watshengisa ukuthi ngemva kwempumelelo yomdlalo webhola kungaba lendaba yobuhlungu engaziwayo ngabantu abanengi.
