Online Reporter
Fungai Muderere
NGENDLELA iqembu leChicken Inn esilungiselele ngayo isizini ezayo eyeCastle Lager Premiership, kukhanya amaqembu amanengi azahlaba umkhosi esehlaselwa “zinkukhu” enkundleni.
Isikhulumi seqembu uBrighton Ncube ubike ukuba okwakhathesi bayasuthiseka ngabantu abaqhatshwe ukuthi bakhokhele kumkhankaso wabo wokwenza kuhle kulisizini. UNcube uthe okwabaqeqetshi sekuphelile, sekusele ukwethulwa kwabadlali abatsha.
Okwenza kubemgceke ukuthi iChicken Inn ifuna ukuzwakala lonyaka yikuqhatshwa kukamqeqetshi kuzwa uTonderai Ndiraya, oseke wabayintshantshu yePSL okwamasizini amabili.
“Sesiqedile ngabaqeqetshi bethu. Okuseleyo okwakhathesi yikumemezela abadlali esilabo,” kutsho uNcube kuliviki, ekhuluma leZimpapers Sports Hub.
“Abaqeqetshi laba, abakhethwe ukuthi babambe umlandu wokuphumelela kweqembu, sibathembile njalo siyazi ukuthi ngolwazi lwabo bazabumba iqembu eliqinileyo.
“Bakhona abatsha eqenjini, kube labanye njalo abathethwe kwezinye indawo abasebenzisa ulwazi lobungcwethi babo. Kuzafiwa enkundleni.”
UNcube ucele bonke abalandeli uqobo bamaGamecocks ukuthi baqhubekele phambili ngosekelo.
“Isizini le ngeyethu ngakho kumele sithole usekelo oluzwayo kubalandeli bethu.”
Kuthimba labaqeqetshi lezinye izisebenzi ezizakhokhelwa nguNdiraya kuloNaison Muchekela loFortune “Fokoza” Ncube abazakuba ngabancedisi bomqeqetshi. UMuchekela uthethe umsebenzi obubanjwe nguPhilani Mabhena, oseSimba Bhora.
Umaneja we-kit yeqembu nguLameck Makuvatsine ongene kundawo kaGuide Goddard.
UGoddard usephiwe isikhundla sokuqeqetsha iqembu labasakhulayo encediswa ngabanye abake badlalela iqembu elikhulu uBen Nyaunzvi loDanny “Deco” Phiri.
Abanye abangena umsebenzi nguTafadzwa Raphael Kutinyu osengumhlaziyi wokudlala kwethimu. UZwanayi Kawadza nguye ophethe onozinti, ungene esikhundleni sika-Energy Murambadoro, laye osekuSimba Bhora.
